Ngjarje e tmerrshme në Marsejë, një adoleshent francez “u godit 50 herë me thikë” dhe më pas u dogj i gjallë

Qyteti jugor francez i Marsejës u trondit këtë javë nga dy vrasje me sa duket të lidhura me drogën, duke përfshirë vrasjen e një djali 15-vjeçar, i cili u “godit 50 herë me thikë” dhe u dogj i gjallë.

Marseja, qyteti i dytë më i madh i Francës, por edhe një nga më të varfrit, është goditur nga dhuna e lidhur me drogën, shkruajnë mediat e huaja, përcjell Telegrafi.

Qyteti historik port në brigjet e Mesdheut ka dëshmuar vitet e fundit një luftë në terren për kontrollin e tregut shumë fitimprurës të drogës midis klaneve të ndryshme, duke përfshirë DZ Mafia dhe Yoda.

Problemi u shfaq edhe një herë në sy të publikut këtë javë, me prokurorin e Marsejës, Nicolas Bessone, duke thënë në një konferencë shtypi të dielën se viktimat dhe autorët e një dhune të tillë po bëheshin gjithnjë e më të rinj.

Një adoleshentë 15-vjeçar u vra të mërkurën në një rast që Bessone e përshkroi si një “egërsi të paprecedentë”.

Ndërkohë të premten, një futbollist 36-vjeçar, Nessim Ramdane, u qëllua dhe u vra “me gjakftohtësi” nga një 14-vjeçar në një rast të lidhur me vrasjen e së mërkurës.

Dy rastet e fundit nënkuptojnë se numri i vrasjeve të lidhura me drogën në Marsejë është rritur në 17 që nga fillimi i vitit, theksojnë mediat e huaja, përcjell Telegrafi.

Siç theksohet, adoleshenti ishte punësuar përmes rrjeteve sociale nga një i burgosur 23-vjeçar për të frikësuar një konkurrent duke i vënë zjarrin derës së tij, tha prokurori, duke shtuar se të riut i ishin premtuar mbi 2000 dollarë.

I paraburgosuri i burgut Luynes në jug të Aix-en-Provence e kishte përshkruar veten si një anëtar i DZ Mafia.

Gjatë misionit të tij, adoleshenti u pikas nga anëtarët e një bande rivale, të cilët e kontrolluan dhe zbuluan se ai mbante një armë.

Dhe për të ndëshkuar të miturin e kanë goditur vazhdimisht me thikë dhe më pas i kanë vënë flakën.

“Ai u godit 50 herë me thikë dhe u dërgua në shtëpinë e banimit Fonscolombes, ku, sipas rezultateve të autopsisë, ai u dogj i gjallë”, tha Bessone.

Shoku i tij, gjithashtu 15 vjeç, mundi të arratisej, shtoi Bessone.

Në shtator, Franck Rastoul, prokurori publik në gjykatën e apelit Aix-en-Provence, paralajmëroi për dhunën e lidhur me drogën.

“Është e domosdoshme që ne të kuptojmë plotësisht shkatërrimin e trafikut të drogës, i cili minon themelet e shoqërisë sonë”, tha ai.

Rastoul tha se të rinjtë ishin “të dehur nga paratë e lehta të drogës” deri në “mospërfillje totale për jetën njerëzore”.

Ndryshe, thuhet se dhuna e lidhur me drogën shkaktoi një numër rekord prej 49 vdekjesh në Marsejë vitin e kaluar. /Telegrafi/