Nga e hëna, në veri nuk lejohet qarkullimi i automjeteve të paregjistruara

Nga 24 shtatori 2018 Policia e Kosovës për rajonin e veriut do të kryejë kontroll të shtuar të automjeteve, gjatë të cilit do të konfiskohen automjetet teknikisht të parregullta dhe automjetet e paregjistruara. Ndërsa ndaj personave që i drejtojnë ato do të ndërmerren masa ligjore.

Po u vjen fundi automjeteve të paregjistruara, të cilat qarkullojnë rrugëve të veriut të Kosovës prej përfundimit të luftës e deri më tani, pasi që Policia e Kosovës do ta zbatojë një plan operativ në veri, sipas së cilit të gjitha automjetet që qarkullojnë pa tabela të regjistrimit do të konfiskohen.

Në komunat veriore të Kosovës kanë qarkulluar automjete pa tabela të regjistrimit, ndërsa janë parë edhe vetura me tabela, të cilat i lëshojnë organet e përkohshme që funksionojnë me sistemin e Serbisë. Në kuadër të dialogut në mes të Kosovës dhe Serbisë në vitin 2012 në Bruksel ishte arritur Marrëveshja për Tabelat e Regjistrimit në kuadër të Marrëveshjes për Lirinë e Lëvizjes nga viti 2011. Me këtë marrëveshje do të duhej të hiqeshin të gjitha tabelat e regjistrimit të MUP-it të Serbisë në qytetet e Kosovës. Pas kësaj, në vitin 2016 delegacioni i Beogradit dhe ai i Prishtinës ishin marrë vesh që vlefshmëria e tabelave me status neutral “KS” të vazhdojë edhe për 5 vjet. Gjithashtu atëherë ishte harmonizuar marrëveshja që mbi tabelat me shenjat “SRB” dhe “RKS” të ngjiten shirita të bardhë gjatë kalimit të pikave kufitare nga Kosova në Serbi dhe anasjelltas.

Mirëpo kjo marrëveshje nuk është realizuar në terren në tërësi, pasi që personat që ngasin veturat me tabelat e regjistrimit “RKS” nuk mund ta kalojnë kufirin me Serbinë pa tabela të përkohshme (provuese), derisa vozitësve të veturave me tabelat “KS” u lejohet kalimi pa problem. Në anën tjetër, serbët që jetojnë në jug i kanë regjistruar veturat e tyre me tabelat e Kosovës qysh atëherë kur ishte arritur Marrëveshja në Bruksel për Tabelat e Regjistrimit të Veturave. Që atëherë në mjediset serbe në Kosovën Qendrore në tërësi janë larguar tabelat e regjistrimit, të cilat i ka lëshuar MUP-i i Serbisë nëpër komunat e Kosovës, shkruan “Zëri”.

Policia e Kosovës ka njoftuar se që nga 24 shtatori automjetet pa tabela të regjistrimit nuk do të mundë të qarkullojnë nëpër rrugët e komunave veriore.

Policia e Kosovës për rajonin e veriut do të kryejë kontrollin e shtuar të automjeteve, gjatë të cilit do të konfiskohen automjetet teknikisht të parregullta dhe automjetet e paregjistruara, ndërsa ndaj personave që i drejtojnë ato do të ndërmerren masa ligjore.

Në Policinë e Kosovës kanë thënë se masat e shtuara dhe kontrollimi i automjeteve, si dhe masa të tjera preventive janë të domosdoshme para së gjithash për sigurinë e qytetarëve, në veçanti të fëmijëve, zvogëlimin e aksidenteve e gjitha me qëllim të shtimit të sigurisë së pjesëmarrësve në komunikacion.

“Nga 24 shtatori i këtij viti nga ana e zyrtarëve policorë të rajonit të veriut të Mitrovicës do të ndërmerren masa policore në të gjitha komunat e rajonit të veriut të vendit për shtimin e kontrollit të automjeteve të importuara nga jashtë, si dhe të të gjitha veturave që nuk kanë dokumentacion të duhur dhe ato që janë të paregjistruara.

Në bazë të planit operativ të Drejtorisë Rajonale të Policisë së Kosovës në veri, këto automjeteve do të shkyçen nga komunikacioni, ndërsa ndaj personave që i drejtojnë ato do të ndërmerren masa ligjore në kuptimin e konfiskimit të automjeteve dhe procedimin e rasteve”, thuhet në një komunikatë të Policisë së Kosovës. Policia ka shtuar se do të bëhet kontrolli detaj edhe i pjesëmarrësve në trafik, gjegjësisht verifikimi i komplet dokumentacionit të drejtuesit të automjetit (leja e qarkullimit, patenta e shoferit, polisa e sigurimit etj.), si dhe aftësia e pjesëmarrësve në komunikacion për të drejtuar automjetin (alkooltesti).
Sipas Policisë, në komunat veriore të Kosovës në komunikatë marrin pjesë një numër i madh i automjeteve teknikisht të parregullta të importuara nga bota e jashtme, automjeteve pa dokumente të nevojshme të qarkullimit e automjete të paregjistruara. Një kësi lloji automjetesh, sipas Policisë, shfrytëzohet për transportin e udhëtarëve si taksi, por edhe për punë të tjera të paligjshme. “Për shkak të parregullsive teknike të këtyre automjeteve ka ardhur deri te aksidentet në komunikacion, të cilët për pasojë kanë pasur lëndime fizike, dëme materiale, fatkeqësisht disa nga ato kanë përfunduar me fatalitet”, ka përkujtuar Policia.