Nga ‘djalosh i topave’ drejt majave të futbollit – Angel Gomes, talenti që pritet të nënshkruajë kontratë të majme me Unitedin

Angel Gomes ishte i destinuar për t’u bërë futbollist. Talenti i Manchester Unitedit ka marrë këshilla profesionale që nga fëmijëria dhe i ka shfrytëzuar ato për t’u inkuadruar në ekipin e parë të Djajve të Kuq.

19-vjeçari ka qenë një prej anëve pozitive të klubit anglez këtë sezon dhe raportohet se do të nënshkruajë kontratë të re të përmirësuar me Unitedin.

Babai i tij, Gil, ka luajtur në Zvicër, në Shtetet e Bashkuara të Amerikës dhe në Itali, ndërsa me Portugalinë U-21 e ka ftuar Kupën e Botës në vitin 1991. Kurse gjyshi tij e ka fituar katër herë Ligëne Premier, si edhe Ligën e Kampionëve dhe Kampionatin Evropian.

https://www.instagram.com/p/BsYtXNpD5DO/

Gjatë karrierës si futbollist, babai i Gomes ishte shoqëruar me yllin e Manchester Unitedit, Luis Nani, i cili më vonë u bë kumbara i Angel në futboll.

“Ai (Nani) ka qenë i mrekullueshëm me mua dhe më ka dhënë shumë këshilla. Jam me fat që e kam pasur një person të tillë në jetën time. Kur isha më i vogël, ai ishte idhulli im”, kishte thënë Gomes për portugezin.

Angel iu bashkua Unitedit në moshën gjashtëvjeçare dhe ka qenë një prej talentëve më premtues. Në moshën 14 vjeçare, ai luante për ekipin U-17 dhe më vonë luajti edhe për U-18.

Një ish-‘djalosh i topave’, Gomes debutoi për ekipin e parë të Djajve të Kuq si zëvendësues në ndeshjen e fundit të sezonit 2016/2017, ndërsa asokohe ishte 16 vjeç e 263 ditë dhe u bë lojtari më i ri që luante për Unitedin që nga viti 1953. Për më shumë, ai u bë lojtar i parë i lindur në shekullin 21 që luante në Ligën Premier.

“Të arrish nga të qenit djalosh i topave dhe të inkuadrohesh në vend të Wayne Rooneyt, ishte e jashtëzakonshme. Çfarë lojtari për të zëvendësuar. Wayne Rooney është një legjendë e klubit… Ai më ka ndihmuar dhe më ka folur kur po hyja, prandaj ishte gjë e bukur”, ka thënë Gomes për atë ndeshje.

Pesë muaj më vonë, sulmuesi ishte pjesë e ekipit të Anglisë U-17 që e fituan Kupën e Botës në Indi, ndërsa luajti si zëvendësues në finale.

Gjatë këtij sezoni, ai është bërë pjesë e rëndësishme e skuadrës së Ole Gunnar Solskjaer, ndërsa deri më tani ka regjistruar tri paraqitje. Ai luan kryesisht në ‘pozitën e dhjetëshit’, por mund të luajë edhe në anën e majtë apo të djathtë të sulmit.

Falë cilësive të tij, Barcelona dhe Paris Saint-Germaini po e monitorojnë nga afër situatën e lojtarit në Old Trafford. Ai ka kontratë me Unitedin deri në fund të sezonit të ardhshëm, prandaj klubi shpreson që ta bindë ta nënshkruajë kontratën e re. /Telegrafi/