Nexhat Daci lëvdon Hivzi Islamin: Nuk ndikohet – as me puthje e as me topa

Akademiku Nexhat Daci ka folur për kryeakademikun Hivzi Islami që është edhe në krye të Komisionit për Matjen e Territorit.

“Nuk e njoh atë territor, nuk e njoh atë lëmi por, në parim, nëse popullata, ose politika, ose shteti ndahet në baza rajonale, nuk është tematikë e preferuar për involvim, derisa përfshirja e kryetarit të Akademisë e ka një arsye se ai është gjeograf. Në botën shkencore shqiptare, për lëmin me të cilën merret Islami, nuk ka një të dytë e as të përafërt në cilësinë e tij”, ka thënë ai.

Daci, në emisionin Ballë për Ballë në Klan Kosova ka thënë se Islami është krejtësisht i pavarur në qëndrimet e tij.

“Unë po ju garantoj që kryeakademiku ynë nuk mund të ndikohet as me puthje e as me topa. Është absolutisht i pavarur në qëndrimet dhe në profesionin e tij nuk ka konkurrencë në botën shqiptare”.

Daci, duke folur për kolegun e tij, akademikun Rexhep Qosja, ka thënë se ky i fundit mendimet e tij nuk i shpreh asnjëherë brenda Akademisë së Shkencave dhe Arteve të Kosovës. /Klan Kosova/