Nesër publikohet platforma e partive shqiptare në Maqedoni

Nesër pritet të shpallet dokumenti i plotë i liderëve të partive shqiptare në Maqedoni, e cila doli nga takimi me Thaçin dhe Ramën. Po këtë pjesërisht për TV21 e shpjegoi zëdhënësi i BDI-së Bujar Osmani, i cili thotë se kjo marrëveshje parasheh barazi të plotë kombëtare në Maqedoni. Ai thotë se kjo marrëveshje është pasqyrë e gërshetimit të platformave të të gjithë subjekteve pjesëmarrëse në këto takime, përcjell Telegrafi Maqedoni.

“Memorandumi reflekton programet politike të partive politike shqiptare. Është i reflektuar programi parazgjedhor i Bashkimit Demokratike për Integrim. Në esencë është barazia kombëtare dhe ekonomike e shqiptarëve në Maqedoni por natyrisht edhe çështjet tjera të cilat mund të burojnë nga programet e partive politike. Të lejojmë që të miratohen dhe të ratifikohen nga organet e partive respektive dhe nesër do të bëjmë publikimin e këtij dokumenti”, u shpreh Bujar Osmani, Zëdhënës i BDI-së.

Nga koalicioni “Rilindja me BESË” thonë se nuk ka pasur insistim nga takimi i djeshëm me presidentin e Kosovës, Hashim Thaçi për asnjë platformë të përbashkët.

“Takimi me Thaçin ka pasur karakter inkurajues informativ dhe konsultues. Nuk ka pasur ndonjë epilog obligativ për asnjë palë.” 01:03 “Presidenti i Kosovës nuk insiston për asnjë platformë të përbashkët, ai vetëm insistoi që partitë shqiptare në Maqedoni të mund ta unifikojnë qëndrimin e tyre rreth çështjes shqiptare në Maqedoni“, tha Zekirja Ibrahimi, Deputet i “Lëvizjes Besa”.

Analisti politik Ismet Ramadani pret rezultate pozitive nga takimet e liderëve të partive shqiptare në Tiranë dhe Prishtinë.

“Unë pres pozitivitet për shkak se mendoj se kur koordinohet një politikë shqiptare bëhet pozicionim edhe më i mirë dhe nuk mund të gabohet. Jam i bindur se orientimi politik në formimin e koalicionit qeveritar do të jetë i drejtë, do të jetë për ndryshime, për një demokraci institucionale, për një drejtësi që shqiptarët kaherë e kërkojnë dhe për një ndikim të shqiptarëve në politikën e përgjithshme të Maqedonisë”, tha Ismet Ramadani, analist politik.

Kryetari i BDI-së, Ali Ahmeti, Bilall Kasami nga Rilindje me BESË dhe Ziadin Sela nga Aleanca për Shqiptarët më 29 dhjetor u takuan me kryeministrin shqiptar Edi Rama, ndërsa dje me presidentin e Kosovës, Hashim Thaçi për një platformë të përbashkët në bisedimet për formimin e Qeverisë së re. Në këto takime munguan nga PDSH. Mirëpo subjektet pjesëmarrëse në takimet e Tiranës dhe Prishtinës presin që edhe kjo parti të mbështesë platformën politike, e cila përmban zgjidhjen e çështjeve që kanë të bëjnë me avancimin e pozitës së shqiptarëve./Telegrafi/