Në Shëngjin nisin përgatitjet për sezonin veror

Prej disa ditësh në Shëngjin kanë nisur ndërhyrjet për krijimin e kushteve për sezoni e ri veror.

Fillimisht është larguar plastika, ndërsa heqja e mbetjeve drusore të krijuara gjatë dimrit vijon nga ndërmarrja e shërbimeve që paralelisht po kryen edhe plugimin e rërës. Në Shëngjin kanë nisur të mbërrijnë vizitorë e pushues, por këta të fundit thonë se ndërhyrjet duhet të ishin kryer më parë.

Edhe qentë endacakë mbeten një shqetësim që kërkon më shumë vëmendje nga pushteti vendor. Pushuesit e vendosur në bregdetin e Shëngjinit thonë se zgjatja e sezonit është lehtësisht i mundur nëse plazhi është i pastruar dhe i gatshëm edhe përtej sezonit veror.

Temperaturat e larta po shtojnë fluksin e vizitorëve në Shëngjin, por shërbimet nuk po japin ende impaktin e pritur prej tyre. Administratori i Shëngjinit, Tonin Uldedaj thotë se moti i paqëndrueshëm ka ndikuar në realizimin e ndërhyrjeve, por që gjithçka do të jetë gati shumë shpejt.

Sipas drejtuesve të bashkisë Lezhë, ky sezon do të jetë një sukses sa i përket shërbimeve dhe cilësisë së tyre si në bregdetin e Shëngjinit, ashtu edhe të Tales, që janë pjesë e kësaj njësie vendore. /Telegrafi/