Në Komunën e Zveçanit së shpejti do të fillojë implementimi i tatimit në pronën e paluajtshme

Kryetari i Komunës së Zveçanit, Ilir Peci, ka njoftuar se së shpejti do të fillojë implementimi i tatimit në pronën e paluajtshme në këtë komunë.

Në njoftim thuhet se sipas nenit 14, paragrafi 3 i ligjit 06/L-005 për tatim në pronën e paluajtshme të gjithë personat që posedojnë prone të paluajtshme, e cila nuk është e regjistruar në regjistrat e tatimit në pronë, duhet t’i regjistrojnë ato brenda 60 ditëve, shkruan Telegrafi.

Bëhet e ditur se të gjitha të hyrat e mbledhura nga tatimi në pronë do të përdoren për investime të ndryshme kapitale, përfshirë ndërtimin dhe renovimin e shkollave, këndëve të lojërave, hapësirave sportive e të tjerë.

Tutje thuhet se personat që paraqiten vullnetarisht dhe vetë-deklarojnë pronën e tyre do të ju lejohet zbritje në vlerë deri në 30 mijë euro nga vlera e vlerësuar e pronës, ose lirim deri në vlerë prej 50 mijë euro për tokë bujqësore.

Mes të tjerash, bëhet e ditur se gjatë dhe pas kalimit të afatit të vetë-deklarimit, zyrtarët komunal do t’i vizitojnë pronat dhe personat fizik me qqëllim të vrifikimit dhe konfirmitetit të të dhënave të vetë-deklaruara.

Komuna e Zveçanit i ka ftuar të gjithë qytetarët që të paraqiten vullnetarisht në Zyrën e Tatimit në Pronë në komunën përkatëse. /Telegrafi/