Ndryshimet e kuadrove në MPB i “nxehin” negociatat

Atmosferë e nxehtë dhe e tensionuar ka mbretëruar në negociatat e “Përzhino”. Partitë kanë ngecur tek kompetencat e Ministrit të brendshëm në qeverinë kalimtare për ndryshime të kuadrove, transmeton Telegrafi Maqedoni.

Jo zyrtarisht mësohet se pushteti është pajtuar ta tërheq ligjin me të cilën ministrit kalimtar të MPB  i janë marrë kompetencat, por insiston të akordohet një numër i caktuar i ndryshimeve të kuadrove të cilët mund ti bëjë ministri në qeverinë kalimtare.

Kjo kërkesë sipas informatave të 24Vest, është refuzuar në mënyrë kategorike nga opozita. Nga ajo që është rënë dakord deri më tani është se Qeveria do të ketë mandat prej 100 ditësh dhe do të kishte funksionuar deri në gusht, nëse zgjedhjet do të mbahen deri në fund të vitit.

Për sa i përket mediave duhet të krijohet një trup i veçantë “ad hoc”. Katër anëtarët në përbërje të trupit pesë anëtarësh “ad hoc” do të propozohen nga partitë, ndërsa anëtari i pestë do të zgjidhet në marrëveshje midis të zgjedhurve. Ky trup do të sanksionojë dhe mbikëqyr se si do të raportojnë mediat 100 ditë para zgjedhjeve.

Katër liderët e partive në fund do të duhet të japin garanci se kushtet janë plotësuar dhe ta caktojnë datën e zgjedhjeve.

Sidoqoftë, jo zyrtarisht nga pushteti e kontestojnë nënshkrimin eventual të një dokumenti të tillë./Telegrafi/