Ndotësit nga stufat e gazit vrasin 40,000 evropianë çdo vit, zbulon një raport

Stufat me gaz vrasin 40,000 evropianë çdo vit duke “pompuar” ndotës në mushkëritë e tyre, ka gjetur një raport.

Sipas The Guardian, përcjell Telegrafi, stufat nxjerrin gazra të dëmshëm të lidhur me sëmundjet e zemrës dhe mushkërive, por ekspertët paralajmërojnë se ka pak ndërgjegjësim publik për rreziqet e tyre.

Madje, mesatarisht, përdorimi i një stufe me gaz “gërryen” gati dy vjet nga jeta e një personi, sipas një studimi të familjeve në BE dhe MB.

“Shkalla e problemit është shumë më e keqe nga sa mendonim”, ka thënë autorja kryesore Juana María Delgado-Saborit, e cila drejton laboratorin e kërkimit të shëndetit mjedisor në “Jaume I University” në Spanjë.

Studiuesit ia atribuuan 36.031 vdekje të hershme çdo vit sobave me gaz në BE dhe 3.928 të tjera në MB.

Ata thonë se vlerësimet e tyre janë konservatore, sepse ata morën parasysh vetëm efektet shëndetësore të dioksidit të azotit (NO2), dhe jo gazeve të tjera si monoksidi i karbonit dhe benzeni.

Sipas shkrimit të The Guardian, një në tri familje në BE gatuan me gaz, duke u rritur në 54% të familjeve në MB dhe më shumë se 60% në Itali, Holandë, Rumani dhe Hungari.

Rezultatet thuhet se janë në përputhje me një studim në SHBA në maj, i cili zbuloi se stufat me gaz dhe propan kontribuojnë deri në 19,000 vdekje të të rriturve çdo vit. /Telegrafi/