Ndërtimi i kryeqytetit më të ri në botë, ende një mister

Ndërtimi i një kryeqyteti të ri prej 10 miliardë dollarësh në Sudanin e Jugut mbetet mister, me pothuajse asnjë përparim në më shumë se 13 vjet kur edhe u njoftua për herë të parë.

Kryeqyteti Ramciel ndodhet në Lakes, zonë që dikur ishte zonë e njohur për rinoçerontët.

Pavarësisht mungesës së përditësimeve të fundit mbi projektin, qeveria këmbëngul se ai është ende në rrugën e duhur. m Qeveria e Sudanit të Jugut njoftoi fillimin e projektit Ramciel në vitin 2023. Megjithatë, asnjë zhvillim tjetër nuk është raportuar që atëherë.

Plani origjinal përfshin zhvendosjen e degës ekzekutive të qeverisë në Ramciel, ndërsa Juba, kryeqyteti aktual, mbetet qendra tregtare e Sudanit të Jugut dhe potencialisht qendra gjyqësore ose legjislative.

Aktualisht, Ramciel është i pabanuar dhe i mungon infrastruktura bazë si rrugët dhe energjia elektrike, shkruajnë mediat e huaja, përcjell Telegrafi.

Kryeqyteti nuk ishte menduar kurrë të ishte një qytet i madh; ai u zgjerua nga një qytet i vogël për të akomoduar një popullsi në rritje pa infrastrukturën e nevojshme. Përkrahësit argumentojnë se kryeqyteti i ri ofron një fillim për një qytet modern të projektuar për përparime teknologjike.

Pavarësisht optimizmit të qeverisë, një studim fizibiliteti i vitit 2006 ngriti shqetësime serioze në lidhje me përshtatshmërinë e Ramciel. Studimi zbuloi se pjesë të zonës së propozuar ishin kënetore dhe të prirura ndaj përmbytjeve, duke hedhur dyshime mbi kapacitetin e tij për të mbështetur zhvillimin urban në shkallë të gjerë.

Planifikimi fillestar për projektin, që thuhet se financohet me rreth 5 milionë dollarë nga Maroku dhe i kryer nga Koreja e Jugut, është përballur me vonesa për shkak të kufizimeve financiare, konsideratave politike dhe sfidave logjistike.

Gjithashtu, ka pasur disa pengesa në ndërtimin e tij, përfshirë pandeminë COVID-19 e cila prishi ndjeshëm planet e vendit.

Ndryshe, disa vende kanë ndërtuar kryeqytete të reja për arsye të ndryshme strategjike, ekonomike dhe politike.

Brazili ndërtoi Brasilian në vitin 1960 për të zëvendësuar Rio de Zhaneiron, duke synuar të promovojë zhvillimin në brendësi të vendit dhe të zvogëlojë përqendrimin e pushtetit politik në rajonet bregdetare.

Në mënyrë të ngjashme, Nigeria e zhvendosi kryeqytetin e saj nga Lagos në Abuja në 1991 për të trajtuar mbipopullimin dhe për të krijuar një kryeqytet të vendosur në qendër për të bashkuar grupe të ndryshme etnike. /Telegrafi/