Naser Rafuna e uron para kohe, Adriana Matoshi: Ende nuk e di nëse i kam arritur votat për deputete

Aktorja e njohur shqiptare, Adriana Matoshi, ka qenë kandidate për deputete në Zgjedhjet parlamentare 2021.

Ajo garoi krah Lëvizjes Vetëvendosje me numrin 60, teksa edhe pse votimi ka përfunduar, nuk dihen ende rezultatet përfundimtare për deputetët që do të zënë ulëset në legjislaturën e ardhshme të Kuvendit të Republikës së Kosovës.

Miku i saj i mirë, aktori Naser Rafuna publikoi në InstaStory një fotografi të aktores me plot urime për të, duke ngjallur pikëpyetjen te fansat nëse Adriana tashmë zyrtarisht i ka fituar votat për deputete.

“Urime shoqja e klasës, mbesa ime, syni, haverica ime, energjia më e mira…ky person do të jetë deputete në Kuvendin e Kosovës. Njeriu që veç duke qeshur më ka shkuar çdo ushtrim shkolle, shfaqje e ndejë. E rrallë si kjo, e drejtë shkurt më e mira. Urime motër”, kanë qenë fjalët e aktorit Rafuna në InstaStory.

Ndërkohë e kontaktuar nga Telegrafi për të pyetur nëse i ka arritur apo jo një rezultat përfundimtar rreth asaj se nëse i ka arritur votat për t’u bërë deputete, Adriana u shpreh se nuk është në dijeni të një gjëje të tillë.

“Jo, në fakt Naseri e ka bërë atë postim nga dëshira e tij dhe thjeshtë për qejf dhe unë ia kam shpërndarë, mirëpo një rezultat të saktë ende nuk ka. Akoma nuk e di se sa vota kam marrë gjithsej dhe nëse i kam arritur apo jo numrin e mjaftueshëm për deputete”, ka thënë Adriana Matoshi për Telegrafin.

Kujtojmë që subjekti politik me të cilin aktorja garon, Lëvizja Vetëvendosje, doli partia më e votuar në Kosovë me mbi 47 për qind të votave deri më tash, teksa pritet finalizimi i rezultateve me numërimin e votave të diasporës dhe atyre me kusht. /Telegrafi/