Musliu: Shkëndija do të tregojë karakter kampioni

Mbrojtësi i Shkëndijës, Visar Musliu, beson se skuadra e tij ka nevojë për më shumë përvojë të nivelit të lartë evropian dhe se do të përpiqet të bëjë një paraqitje të mirë në ndeshjen e kthimit të raundit të tretë kualifikues të Ligës së Kampionëve.

Ekipi nga Tetova humbi me rezultat 3-0 nga Red Bull Salzburgu në ndeshjen e parë si mysafir, ndërsa sonte (e martë) zhvillon ndeshjen kthyese në stadiumin Filipi II në Shkup.

“Neve në ndeshjen e parë na mungoi pak eksperienca nga ndeshje të nivelit të këtillë evropian, duke bërë gabime që na kushtuan me pranim të golave”.

“Kemi analizuar mirë ndeshjen e parë dhe besoj se jemi të përgatitur maksimalisht për ndeshjen e kthimit”.

Lexo po ashtu Lajmet për Shkëndijën

“Do të kërkojmë të tregojmë në radhë të parë karakter kampioni dhe pastaj do të shohim se cili do të jetë rezultati final”, ka deklaruar Musliu.

Duhet theksuar se Shkëndija tashmë e ka shkruar historinë duke arritur deri në raundin e tretë kualifikues të Ligës së Kampionëve.

Nëse e përmbys rezultatin ndaj Salzburgut, do të luajë në ‘play-off’ për fazën grupore të garës më të madhe evropiane (kundër Crvena Zvezdas ose Spartak Trnavas), ndërsa në rast të eliminimit do të luajë në Europa League (kundër Cork ose Rosenborg). /Telegrafi/