Murati: Nuk është shumë e vështirë të rrëzohet Qeveria (Video)

Artan Murati nga KDI ka thënë se dështimi i seancave parlamentare përpos bojkotimit të opozitës është pasojë edhe e neglizhencës së shumicës parlamentare.

Murati në “Dossier D” në RTV Dukagjini ka thënë se pavarësisht seancave të rëndësishme shumë deputetë nuk ndalin udhëtimet e tyre jashtë vendit.

Menaxheri i projekteve në Institutin Demokratik të Kosovës (KDI) ka thënë se deri tani nuk është parë ndonjë vendosmëri e opozitës për të larguar këtë Qeveri nga pushteti.

“Nuk është shumë e vështirë të rrëzohet Qeveria pasi janë parë lëkundje brenda koalicionit qeveritar. Nuk është çudi që edhe ndonjë subjekt nga pozita të votonte rrëzimin e Qeverisë”, tha ai, përcjell Telegrafi.

Murati thotë se është parë se veprimi i Veselit për të larguar disa figura brenda PDK-së nuk është përcjellë edhe nga subjektet tjera qeveritare.

Ai ka thënë se mbetet enigmatike se çfarë mund të ndodh pas zgjedhjeve se cilat do të jenë matematikat për bashkëqeverisje.

“Kemi dëgjuar për një mundësi bashkëpunimi mes LDK-së dhe Vetëvendosjes e cila do të ishte një risi në politikën e Kosovës. Por dy subjektet politike deri tani nuk kanë shprehur gatishmëri për të hequr dorë nga posti i kryeministrit… Mirëpo në Kosovë aleancat nuk mund të merren të mirëqena deri në mbylljen e afatit ligjor nga KQZ-ja pasi kemi parë befasi të minutave të fundit”, tha ndër të tjera Artan Murati./Telegrafi/