Ministria e Kulturës, Rinisë dhe Sportit (MKRS) ka reaguar ndaj raportimeve të sotme lidhur me ndërtimin e stadiumeve në Pejë, Mitrovicë dhe Gjilan.
MKRS përmes një sqarimi publik ka bërë të ditur se procedurat për ndërtimin e këtyre stadiumeve nuk janë anuluar.
Ministria tutje ka theksuar se proceset për stadiumet në Pejë dhe Gjilan janë ende në fazën e vlerësimit si pjesë e procedurave të rregullta, dhe se rezultati i vlerësimeve do të publikohet në ditët në vijim.
Po ashtu, ministria ka konfirmuar se asnjë kontratë ekzistuese lidhur me këto projekte nuk është anuluar.
“Lidhur me raportimet e fundit të mediave për anulimin e procedurave për stadiumin e Pejës, Mitrovicës dhe Gjilanit, sqarojmë se ato nuk janë anuluar. Sa i përket stadiumeve në Gjilan dhe Pejë, proceset janë në fazën e vlerësimit si procedura të rregullta dhe MKRS do të dalë me rezultate në ditët në vijim. Po ashtu, sqarojmë se asnjë kontratë ekzistuese nuk është anuluar”, thuhet në sqarimin e MKRS-së.
Ndryshe në faqen zyrtare të prokurimit “E-prokurim” figurojnë të dhënat se këto tendere janë anuluar.
Ndërtimi i “Stadiumit të Qytetit” në Pejë me 19 milionë euro, rinovimi i “Stadiumit të Qytetit” në Gjilan me vlerë 15 milionë euro dhe rinovimi i stadiumin Adem Jashari në Mitrovicë me vlerë tre milionë euro. /Telegrafi/
