Mishi i qengjit u shit shumë lirë në Maqedoni

Mishi i qengjit nga Maqedonia që është shitur për Pashkët, jashtë Maqedonisë, ka arritur një shifër rekord të rënies së çmimit. Për një kilogram mish qengji është paguar 100 deri 120 denarë, përcjell Telegrafi Maqedoni.

Ziadin Ramadani nga Sellca e Tetovës, që ka 300 kokë dhensh, planifikon që ta ulë fondin e bagëtisë për shkak të çmimit kaq të ulët, duke u ankuar se nuk ka levërdi, ndërkaq vonesat e subvencioneve paraqesin problem shtesë.

Nënkryetari i Lidhjes së bujqve, Mexhit Amiti, thotë se çmimi kaq i ulët është rezultat i monopolit të thertoreve në Maqedoni që kanë të drejtë të blerjes së mishit të qengjit, që më pastaj eksportohet kryesisht në Itali, Gjreqi dhe Kroaci.

Sipas tij, Ministria e Bujqësisë duhet që t’i përfaqësojë blegtorët dhe me aktivitete të caktuara të ndikojë në çmimin e mishit të qengjit, ose t’u lejohet bujqve që ta shesin mishin e qengjit jashtë vendit.

Këtë vit në Maqedoni, në prag të Pashkëve, janë eksportuar 130 mijë kokë qengjash./Telegrafi/