Miley Cyrus po zgjedh të mos përfshihet në grindjet publike brenda familjes së saj, të cilat kanë tërhequr vëmendje pas shqetësimeve të vëllait të saj, Trace, për mirëqenien e babait të tyre, Billy Ray Cyrus.
Trace, 35 vjeç, ndau në Instagram një mesazh për babain e tij, duke e inkurajuar të kërkojë ndihmë pas disa performancave të diskutuara.
Por, sipas tij, Billy Ray reagoi me kërcënime për veprime ligjore në vend që të përgjigjej direkt, shkruan DailyMail.
“Unë ende nuk kam dëgjuar prej tij, përveç një njoftimi për masa ligjore kundër meje”, tha Trace në një postim tjetër.
Sipas burimeve të afërta, Miley ka zgjedhur të qëndrojë jashtë kësaj situate. “Ajo ka punuar shumë për të larguar veten nga drama familjare dhe nuk dëshiron të përfshihet më”, tha një burim për ‘People’.
Ylli i “Flowers” është fokusuar te vetja dhe karriera e saj, duke kaluar një periudhë të mrekullueshme personale dhe profesionale.
Miley, e cila ka qenë e sinqertë për raportet e ndërlikuara me babain e saj, e quajti atë një "hartë udhëzimi" për të mirat dhe gabimet gjatë një interviste në vitin 2024. Ndërkohë, ajo lavdëroi nënën e saj, Tish Cyrus, si heroin e saj kryesor.
Aktualisht, Miley është e përqendruar te projektet e saj muzikore. Ajo ishte në garë për një ‘Critics Choice Award’ për këngën “Beautiful That Way” dhe është nominuar për një tjetër Grammy për bashkëpunimin me Beyoncé në “II Most Wanted”. /Telegrafi/
