Miftari kërkon ndihmën e Plisave për derbin ndaj rumunëve

Drejtori i Sigal Prishtinës, Florian Miftari, i ka bërë thirrje tifozëve të skuadrës “Plisave” që të vijnë në numër sa më të madh në përkrahje të skuadrës në takim me skuadrën rumune Energia, në kuadër të FIBA Europe Cup.

Në një konferencë për media, ish-lojtari i Prishtinës thotë se kjo do të jetë ndeshja më e madhe që është zhvilluar deri tani në sallën e Pallatit të Rinisë.

“U bëj thirrje tifozëve të basketbollit, në veçanti ‘Plisave’ që të vijnë në numër sa më të madh në këtë derbi, i cili është më i madhi që është zhvilluar deri më tani në këtë palestër. Kemi përballë ekipin e pamposhtur në FIBA Europe Cup, Energian, të cilin duam ta mposhtim dhe t’ia shkaktojmë humbjen e parë këtë edicion”, ka thënë Miftari, raporton koha.net.

Ndeshja me Energian, që është e pamposhtur deri tani, mund të jetë vendimtare për kualifikimin e Prishtinës në raundin e dytë të kësaj kupe. Deri tani Prishtina në Grupin K ka dy humbje dhe një fitore. Në takim me Energian kishte pësuar në Rumani me rezultat 87-72. Aktualisht zë vendin e fundit në tabelë, me katër pikë sa i kanë edhe Astana e AEK Larnaca, në pozitat tre dhe dy. Faza e parë grupore në FIBA Europe Cup përfundon në fillim të muajit dhjetor. Dy ekipet e para të secilit prej 14 grupeve avancojnë në fazën e dytë grupore. Ndërsa një vend në fazën e dytë e sigurojnë edhe katër ekipet më të mira që përfundojnë në pozitat e treta nëpër grupe.

Takimi zhvillohet të martën në ora 19:00.