Meta shkon në Samitin e Sarajevës: Kosova është shtet i pavarur, të trajtohet me respekt

Presidenti i Shqipërisë, Ilir Meta mori pjesë në Samitin e Procesit të Bashkëpunimit të Vendeve të Evropës Juglindore (SEECP), që po mbahet në Sarajevë të Bosnjës dhe Hercegovinës me pjesëmarrjen e krerëve të shteteve të vendeve të Evropës Juglindore.

Në fjalën e tij, drejtuar të pranishmëve, Presidenti Meta shprehu keqardhje që kryesuesja e radhës së këtij procesi, Kosova nuk është e pranishme në këtë samit, duke thënë se, “tashmë është koha e duhur që Bosnja dhe Hercegovina, e jo vetëm, të bëjnë përpara në drejtim të njohjes dhe pranimit të realitetit. Republika e Kosovës është shtet i pavarur e sovran dhe duhet të trajtohet me respekt, para së gjithash nga vetë fqinjët e saj”.

Ndërkohë dy ditë më parë, ministri në Detyrë për Evropën dhe Punët e Jashtme, Gent Cakaj, tha se kërkesa e organizatorëve proserbë, që presidenti i Kosovës të mos ftohet si përfaqësues shteti është e papranueshme.

Lexo po ashtu Dodik: Askush nuk do të qajë nëse Thaçi s’merr pjesë në samitin e Sarajevës

Për pasojë, Tirana zyrtare tha se nuk do të marrë pjesë në Samitin e SEECP organizuar nga Bosnja e Hercegovina.

Lexo po ashtu Cakaj: Shqipëria solidarizohet me Kosovën, anulon pjesëmarrjen në samitin e SEECP në Bosnjë

Në një postim në rrjetin social Twitter, ministri në Detyrë shkruante të dielën se trajtimi nga organizatorët ndaj Kosovës shkon kundër synimit për të krijuar një atmosferë besimi, marrëdhënie të fqinjësisë së mirë dhe stabilitet.

Sipas Cakajt nuk mund të ketë bashkëpunim pa trajtim të barabartë. /TCH/