Merkel vazhdon ‘luftën’ për mbijetesën e koalicionit qeverisës

Kancelarja gjermane, Angela Merkel do të bëjë të hënën përpjekjen e saj të fundit për t’i dhënë fund debatit për migrimin me aleatët e saj konservatorë.

Ajo pritet të diskutojë me ministrin e Brendshëm gjerman, Horst Seehofer, i cili ka ofruar dorëheqje, duke vënë në dyshim jetëgjatësinë e qeverisë së kancelares Merkel.

Horst Seehofer, ka ofruar dorëheqje të postit ministror dhe pozitës udhëheqëse në Unionin Krisitan-Demokrat, në një takim maratonik të kësaj partie, ditën e diel, në të cilin është diskutuar nëse duhet mbështetur propozimi i Merkelit, që është diskutuar javën e kaluar në samitin e Bashkimit Evropian të mbajtur në Bruksel.

Mirëpo ai është shtyrë nga kolegët e partisë për t’u takuar edhe një herë me kancelaren gjermane të hënën, në tentim të zgjidhjes së konfliktit dhe ka thënë se do të marrë vendimin përfundimar brenda tri ditëve.

Kristian-Demokratët e Merkelit (CDU), varen nga partnerët tjerë të aleancës, Kristian-Socialët (CSU) dhe ata të koalicionit SPD, për të mbajtur pushtetin.

Kriza politike në Gjermani është shenja e fundit e rritjes së ndasive brenda Bashkimit Evropian, pasi në mesin e tyre ka vende që përkrahin hapjen e kufinjve dhe vende tjera që kërkojnë kufizim të numrit të migrantëve që hyjnë në vendet e bllokut.

Zyrtarët e Kristian-Socialëve (CSU) akuzojnë Merkelin për kundërshtim të një varg kompromisesh të bëra nga Seehofer, për të zgjidhur konfliktin me CDU-në.

Seehofer, i cili i ka kërkuar Merkelit të ashpërsojë politikën e saj për refugjatët, u ka thënë kolegëve të tij të dielën se ai nuk sheh mundësi tjetër përveç kthimit të migrantëve në kufi.

Merkel në anën tjetër ka kundërshtuar këtë ide.

Në një situatë tejet tensionuese, Merkel dhe Seehofer pritet të takohen më vonë gjatë ditës.

Një anëtar i partisë së CSU-së, Hans-Peter Friedrich, ka thënë se kundërshtimet e Merkelit për kompromiset e propozuara nga Seehofer tregojnë se ajo do të ishte e gëzuar nëse ai largohet.

Liderët e CSU-së janë të ndarë rreth edhe asaj se si të përballen me partinë kundër migrantëve, Alternativa për Gjermaninë (AfD) në zgjedhjet rajonale të muajit tetor.

Seehofer u ka thënë kolegëve tij gjatë komitetit të së dielës se diskutimet me Merkelin kanë qenë të pafrytshme, ka njoftuar një burim i partisë.

Mundësia e ndarjes së aleancës 70 vjeçare në mes të CDU-së dhe CSU-së do të ndikonte në humbjen e shumicës parlamentare për kancelaren Merkel.

Ky rezultat do ta përballte lideren gjermane, ose me mundësinë e drejtimit të Qeverisë së pakicës, ose mbajtjes së zgjedhjeve të reja.

Javën e kaluar, liderët e BE-së janë pajtuar për të pranuar refugjatë në baza vullnetare dhe për të krijuar “qendra të kontrollit” brenda bllokut, në mënyrë që të analizohen kërkesat për azil. /REL/