”Mbyllja 90 ditëshe e “Joughromit”, për pikë politike” (Video)

Shoqatat ekologjike në Tetovë thonë se nuk kanë qenë të informuara se vendimi i Ministrisë Ambientit jetësor parasheh mbylljen e kombinatit të Jugorhomit vetëm për 90 ditë. Pas publikimit të vendimit në Alsat drejtuesit e shoqatave që protestonin kundër ndotjes së ajrit thonë se me këtë vërtetohen dyshimet e tyre se vendimi ka prapavijë politike.

“Nuk kemi pasur një informacion të atillë se mbyllja e Jugohromit është bë sa për të kaluar zgjedhjet, megjithëse, dyshimet i kemi pasur dhe ato i kemi shprehur edhe hapur. Fakti se Jugohromi po mbyllet vetëm sa të kalojnë zgjedhjet tregon qartë se kjo qeveri nuk është e interesuar për shëndetin dhe jetën e qytetarëve por vetëm për pozitat e tyre në Pushtet”, tha për Alsat-M, Arianit Xhaferi nga EcoGuerilla.

Nga Shoqata “Nëna dhe Fëmija” thonë se betejën do ta çojnë deri në fund dhe nuk do të lejojnë që dikush të tallet me shëndetin e tyre.
“Faktikisht nuk kemi mundur ta dimë por dyshimi ka ekzistuar që në fillim, dhe kemi thënë që ditën e parë që të mos krijohet eufori, derisa ta verifikojmë saktë se për çka bëhet fjalë. Dhe ja dëshpërimi ndodhi, siç e publikuat edhe ju ditë më parë, që ata do të tentojnë rihapje të fabrikës pas zgjedhjeve sepse është logjike sepse e kaluara e ka dëshmuar këtë. Por ne do mundohemi me gjitha forcat, nuk lejojmë të luajnë me ne”, deklaroi Narta Kasa-Vejseli, Nëna dhe Fëmija

Për qytetarët kjo aspak nuk është e çuditshme, ata shprehen se kjo ishte vetëm një lojë politike në prag të zgjedhjeve.
“Për zgjedhjet ishte kjo, më shumë për zgjedhjet është. Unë mendoj se për zgjedhjet e kanë mbyll në tjetër gjë nuk besoj”, tha një banor.
“Puna e Jugohromit dihet është punë politike nuk ka të bëj me tjetër gjë. Thjeshtë qytetarët duhet të protestojnë si e si të mbyllet Jugohromi, jo vetëm për 90 ditë por duhet mbyllet për krejt ose të vendos filtra dhe të punoj me rregull”, shtoi një tjetër banor.

Ndryshe në reagimin e Ministrisë së ekologjisë hidhet poshtë pohimet e tilla duke theksuar se afati prej 90 ka për bazë nenin 200 të ligjit për mjedisin jetësor. Ky afat është si shans për të mënjanuar shkaqet për gjendjen e krijuar nga objektet ose instalimet me veprimtari të dëmshme sikurse ndotja.