Mbi 250 mijë vende të lira pune për zanatçinjtë, ekonomia gjermane po vuan nga mungesa e fuqisë punëtore

Ekonomia gjermane vuan nga mungesa e fuqisë punëtore. Kritikat e krerëve të ekonomisë gjermane lidhen me procedurat administrative të komplikuara dhe qëndrimin e autoriteteve të vizave.

Për shkak të mungesës së ndjeshme të fuqisë punëtore, krerë kryesorë të ekonomisë gjermane kërkojnë lehtësimin e rregullave të migrimit.

“Ne në Gjermani kemi vështirësi të mëdha zgjerimi të ndërmarrjeve, sepse thjesht nga mungon fuqia punëtore”, është shprehur presidenti i Dhomës Gjermane të Industrisë dhe Tregtisë (DIHK), Peter Adrian.

Edhe sekretari i përgjithshëm i Shoqatës Qendrore të Zanateve Gjermane, Holger Schwannecke ka theksuar se aktualisht në degën e zanatçinjve gjermanë ka mbi 250 mijë vende të pazëna pune.

“Ne kemi nevoje me urgjencë për fuqi të kualifikuar. Dhe këtë duhet ta bëjmë përmes kualifikimit të mëtejshëm në vend dhe rekrutimit të të gjitha potencialeve të brendshme, por edhe përmes prurjes së fuqisë punëtore nga jashtë”, thekson Schwannecke.

Në këtë drejtim bëhet shumë pak.

Kreu i DIHK-së ka kritikuar pengesat që ndeshin forcat e kualifikuara nga jashtë.

“E nevojshme është një procedurë e pakomplikuar e konsullatave dhe përfaqësive jashtë. Kjo dështon në moment thjesht nga strukturat e administratës”, tha Adrian.

Edhe Schwannecke kritikon procedurat e gjata për dhënien e vizës, “konsullatat janë të mbingarkuara”. Shumë gjëra ende bëhen me dorë, dhe jo në formë digjitale dhe nuk është frytdhënëse, që ende “nuk kemi një kulturë mirëseardhjeje për fuqinë e kualifikuar punëtore”.

Adrian rrëfen një rast se si për ndërmarrjen e tij me ndihmën e Dhomës së Tregtisë së Jashtme mori një punëtor nga Maroku.

“Kjo zgjati 10 muaj. E madje më uruan të gjithë, se u bë kaq shpejt. Ka raste ku procedurat zgjasin dy ose tre vjet. Kjo nuk lidhet vetëm me procedurat që nuk janë më të kohës, por edhe në qëndrimin e autoriteteve në vend”, përfundon ai.

Shumë shpesh konceptet e shërbimit dhe orientimit për ofrimin e shërbimeve janë të panjohura. /Deutsche Welle/