Marigona e Arlinda Hajdari dhe Leonora Demaj edhe në edicionin e ardhshëm luajnë në Superligën e Danimarkës në hendboll

Skuadra Ringkobing do të luajë edhe në kampionatin e ardhshëm në Superligën e Danimarkës në hendboll. Superliga e Danimarkës është prej ligave më të forta në botë, kurse Ringkobingu fitoi të shtunën ndaj Ringsted për ta konfirmuar vendin në elitë.

Ringkobingu fitoi dy ndeshjet e ‘play-outit’ ndaj Ringsted dhe kështu mbeti pjesë e elitës. Të shtunën skuadra e tri hendbollisteve tona fitoi bindshëm, 33-16.

Kapitenia e Kosovës, Leonora Demaj, shënoi katër gola për Ringkobingun. Katër gola i shënoi edhe Marigona Hajdari, hendbollistja tjetër shumë e rëndësishme e Dardanëve. Marigona është shquar edhe me organizim të lojës.

Ndërkohë motra e Marigonës, Arlinda, ende po mungon për shkak të lëndimit që e pësoi verën e kaluar. Ajo do të kthehet në edicionin e ardhshëm dhe do të jetë e rëndësishme për Ringkobingun e po ashtu edhe për Kosovën.

Mbetja e Ringkobingut në elitë është e rëndësishme edhe për Kosovën. Kështu tri prej lojtareve tona kryesore do të luajnë në një top-kampionat evropian dhe do të kenë çdo javë ndeshje të forta.