Maqedoni, vazhdon mësimi ‘online’ deri në fund të vitit shkollor

Ministri i Arsimit dhe Shkencës, Arbër Ademi në konferencë për shtyp deklaroi se për sivjet është anuluar matura shtetërore, matura shkollor dhe provimi përfundimtar për këtë vit shkollor për nxënësit e shkollave të mesme.

“Të gjithë këto do të marrin diploma për arsim të mesëm të kryer me të njëjtën rëndësi si vitet e kaluara”, tha Ademi duke shtuar se me këtë i mundësojnë maturantëve të shmangin stresin dhe të përkushtohen në gjetjen e punës ose të ndjekin arsimin e lartë në fakultete, njofton Telegrafi Maqedoni.

Ai bëri të ditur se nxënësit e shkollave fillore dhe të mesme deri më 10 qershor nuk do të kthehen në bankat shkollore.

Regjistrimi i nxënësve në klasë të parë për vitin shkollor 2020/2021 në vend që në maj do të realizohet në qershor. Listat e nxënësve të regjistruar, shkollat do t’i publikojnë më së voni deri më 15 korrik, ndërsa ata që nuk do të
regjistrohen do të marrin njoftim me shkrim.

Janë edhe disa masa të tjera që i komunikoi Ademi për, siç tha ai, funksionimin e papenguar të sistemit edukativo-arsimor në kushte të pandemisë së Covid-19, ndërsa janë miratuar në partneritet me institucione të tjera dhe sektorin civil.