Maqedoni, rreth 250 fëmijë jetojnë pa familje

Rreth 250 fëmijë në Maqedoni, prej të cilëve 70 janë të moshës nën tre vjeç, nuk e kanë të drejtën të jetojnë në mjedis familjar, tregojnë të dhënat e UNICEF-it.

Me qëllim që të gjenden mënyra për sigurim të kushteve për çdo fëmijë në vend që të rritet në mjedis të sigurt dhe të kujdesshëm familjar sot në Shkup do të mbahet konferencë me temë “Për çdo fëmijë, familje”, përcjell Telegrafi Maqedoni.

Në konferencë do të flitet për aktivitetet parandaluese dhe mbështetjen e familjeve biologjike dhe zhvillimin e formave të reja të kujdesit dhe angazhimin e qeverisë që deri në vitin 2020 t’i vihet fund akomodimit të fëmijëve pa prindër nën moshën tre vjeç në institucione të mëdha.

Pjesëmarrësit në konferencë do të diskutojnë për zhvillimin e sistemit të familjeve përkujdesëse, për investime në përmirësimin e cilësisë së zgjidhjeve alternative për kujdes përmes standardizimit të tyre, investimit në detektimin e hershëm dhe intervenimin e hershëm, dhe investimin tek vetë fëmijët përmes rritjes së investimeve në arsimin parashkollor dhe zhvillimin e hershëm të fëmijëve.

Në konferencë do të kenë fjalim ministrja e Punës dhe Politikës Sociale, Mila Carovska, shefi i Delegacionit të Bashkimit Evropian, Samuel Zhbogar dhe përfaqësuesi i UNICEF-it, Benjamin Perks./Telegrafi/