Maqedoni, niveli i ndotjes së ajrit vazhdon të jetë alarmant

Niveli i lartë i ajrit të ndotur ka mbizotëruar dhe sot në shumë komuna të vendit. Sipas stacioneve matëse të Ministrisë së Ambientit Jetësor, koncentrimi më i madh i grimcave PM10 dhe PM 2,5 rezulton të jetë në Komunën e Tetovës, Kërçovës, Kumanovës, Qendrës, Gazi Babës dhe vendbanimit Rektorat.

Pavarësisht kësaj situate, Bashkia e Shkupit ende nuk ka filluar me zbatimin e masave konkrete kundër ndotjes së ajrit. Kreu i Bashkisë, Petre Shilegov, deklaroi se ky problem jetik me të cilët përballen qytetarët do të tejkalohet gjatë periudhës që vjen.

Masa e vetme konkrete e cila është vënë në funksion deri më sot është instalimi i 12 pajisjeve për pastrimin e ajrit në njërën nga çerdhet e komunës Qendër si donacion nga ana e “Rotary Club” Shkup.

Ditë më parë Ministria e Ambientit Jetësor dhe Bashkia e Shkupit paralajmëruan disa masa të cilat do të ndikonin në përmirësimin e cilësisë së ajrit, por deri më sot ende nuk ka ndonjë hap konkret në këtë drejtim.

Shoqata të ndryshme joqeveritare dhe qytetarët adresuan kritika të shumta mbi këta masa duke thënë se të njëjtat janë të papërshtatshme.