Makerspace Innovation Center Prizren, vendi që frymëzon inovatorët dhe ndërmarrësit e rinj

Dëshira e një grupi të rinjve nga Prizreni për të pasur një qendër të komunitetit për zhvillimin dhe rritjen e ideve në fushën e teknologjisë është bërë sebep për formimin e Makerspace Innovation Center Prizren.

Hapat e parë janë vënë në vitin 2017. Një grup i vogël i profesionistëve e entuziastëve të Teknologjisë së Informacionit dhe të Komunikimit në saje të mbështetjes modeste nga organizata “Help” kanë arritur që ta hapin qendrën, në hapësira të kufizuara.

Pavarësisht kësaj vullneti i tyre ka qenë i çeliktë për të nxitur moshatarët e tyre për inovacion e ndërmarrësi. Por edhe për të aftësuar gjeneratat më të reja.

Kësisoj pas punës disavjeçare, Makerspace Innovation Center Prizren është shndërruar në bërthamën e ekosistemit digjital të Prizrenit, duke zënë vend të rëndësishëm edhe në kuadër të Parkut të Inovacionit dhe Trajnimeve, në ish-kampin e KFOR-it gjerman.

Njëri prej bashkëthemeluesve të kësaj qendre, Arbër Kryeziu kujton nisjen e këtij rrugëtimi para 7 vitesh.

“Makerspace është iniciativë që ka filluar në vitin 2017. Por si ka filluar? Pas disa viteve të studimeve dhe punës në Prishtinë, ne u kthyem në Prizren dhe e pamë që qytetit po i mungon një qendër ku të rinjtë dhe të rejat munden me u taku, me u bë bashkë dhe me i nda të njëjtat brenga dhe me u zhvillu bashkërisht”, ka thënë Kryeziu për Telegrafin.

Sipas tij, falë një donacioni të asaj kohe është bërë e mundur ofrimi i trajnimeve në shkathtësi digjitale dhe ndërmarrësi.

“Makerspace ka qenë një ide, apo një ëndërr bashkë me Enisin gjatë kohës së studimeve. Duke e parë mungesën që e kishte Prizreni, ne e morëm, iniciativën bashkë me disa të rinj të tjerë për ta krijuar këtë qendër. Edhe bashkë me organizatën Help që na besuan në fillet e para të kësaj iniciative ne hapëm Makerspace Innovation Centre 1.0 në një hapësirë prej 100 metrave katrorë me dy klasa të vogla dhe një laborator, por me një dëshirë dhe vullnet për me bë shumë punë për të rinjtë dhe të rejat në Prizren, duke ofruar trajnime të ndryshme në shkathtësi digjitale, në ndërmarrësi, dhe kjo qendër të shërbej si adresë, dhe me bë Prizrenin me u dallua si një qendër e zhvillimit teknologjik”, ka deklaruar Kryeziu.

Në vitet e para të punës përqendrimi ka qenë në trajnime, hapësira të përbashkëta të punës si dhe në aktivitetet e rrjetëzimit për komunitetin.

Puna me përkushtim ka bërë të mundur edhe transformimin përkatësisht rritjen e kësaj qendre vetëm brenda pak viteve të veprimtarisë. Me kalimin e viteve janë zgjeruar kapacitetet dhe ekipi, dhe Makerspace është bërë një shtyllë e rëndësishme që promovon inovacionin, edukimin dhe ndërmarrësinë në Prizren dhe më gjerë.

Drejtori Ekzekutiv i Makerspace Innovation Center Prizren, Enis Qafleshi ka bërë të ditur se shndërrimi i ish-kampit ushtarak të KFOR-it gjerman në Park të Inovacionit dhe Trajnimeve ka hapur horizontin për zgjerimin e veprimtarisë së kësaj qendre.

“Aktiviteti i Makerspace prej vitit 2021 është zhvendos në Parkun e Inovacionit dhe Trajnimeve, pikërisht për arsyen e komplementimit të aktiviteteve tona me qëllimin e këtij parku. Besojmë se i kemi sjellë një vlerë të mirë qytetit përgjatë tri viteve të operimit para Parkut, me një pauzë të lehtë përgjatë vitit të pandemisë dhe tash këto tri vite brenda këtij parku. Dua të theksoj se aktiviteti ynë zgjeruar me ofrimin e shërbimeve për ndërmarrësit e rinj, konkretisht bizneseve startup, me ofrimin e shërbimin për kompanitë ekzistuese dhe ato në rritje përmes transformimit digjital si dhe ofrimin e trajnimeve dhe aftësimit profesional për të rinjtë dhe të rejat dhe të gjitha nivelet e moshave të rritura”, ka thënë Qafleshi për Telegrafin.

Aktualisht, e vendosur në ITP, Qendra e Inovacionit Makerspace Prizren ofron programe të arsimit dhe trajnimit profesional me fokus në punësim; mbështetje për ndërmarrësinë dhe fillimin e bizneseve të reja; hapësira të përbashkëta pune; MakersLab – laboratorin e industrisë krijuese, si dhe aktivitete dhe ngjarje për rrjetëzim të fokusuara në komunitet.

Në këtë rrafsh është një vend ku inovatorët, ndërmarrësit, entuziastët e teknologjisë dhe studentët mblidhen së bashku për të shkëmbyer ide, zhvilluar teknologji të reja dhe për të pasur një ndikim në të gjithë komunitetin.

Deri më tani kjo qendër ka bashkëpunim me 40 partnerë, ka krijuar mbi 200 vende pune, ka mbi 1,000 përfitues trajnimesh, mbi 3,000 njerëz të përfshirë, pastaj mbi 40 ekipe të startup-eve dhe ka realizuar afër 270 ngjarje, raporton Telegrafi.

Mirëpo këtu nuk marrin fund synimet e ekipit të Makerspace.

“Tash e tutje do të shohim përpara për një rrugë te re të zhvillimit të ekosistemit digjital të Prizrenit dhe rajonit me qendër fokusi në këtë vend dhe këtë Park”, ka përfunduar Qafleshi. /Telegrafi/