Dritat e pemës kanë fuqinë të transformojnë të gjithë hapësirën, duke e kthyer një banesë të zakonshme në një strehë të ngrohtë dhe festive
Gjatë zbukurimit të shtëpisë për festat e fundvitit, shumë e rëndësishme është se ku i vendosni dritat: pozicionimi i duhur e rrit efektin ndriçues, krijon atmosferë dhe e bën hapësirën të duket më e madhe. Ja disa këshilla për të krijuar një ambient të këndshëm, të thjeshtë dhe festiv, në të cilin do të kënaqeni javëve në vijim.
Roli i vargjeve të dritave në krijimin e atmosferës festive
Dritat e Vitit të Ri nuk janë vetëm dekor, por një nga elementet më të rëndësishme të atmosferës së festave. Ato japin një dritë të ngrohtë që e bën ambientin mikpritës dhe ndihmon në thyerjen e errësirës së dimrit. Shpesh, një varg dritash i vendosur mirë mjafton që një dhomë të duket krejt ndryshe.
Ritmi dhe ngjyra e dritave mund të shprehin madje edhe stilin tonë personal: disa preferojnë dritat klasike me ton të ngrohtë, ndërsa të tjerëve u pëlqejnë dritat me shumë ngjyra, lozonjare, ose ato që pulsojnë, transmeton Telegrafi.
shutterstock
Ku duken më bukur dritat e Vitit të Ri:
• Pas perdeve – drita e zbutur pas perdeve krijon ndriçim të këndshëm në sfond, pa pasur nevojë për dritë qendrore.
• Mbi derë ose mbi një komodë/policë të ulët – një vijë horizontale drite mbi nivelin e syve e bën hapësirën të duket më e ngrohtë dhe më e madhe.
• Në cepat e dhomës, të drejtuara lehtë nga tavani – ndriçimi indirekt që përhapet në tavan dhe mure krijon atmosferë të qetë dhe shumë të butë, perfekte për një mbrëmje me çaj dhe libër.
Sipas dizajnerëve, mos e mbingarkoni hapësirën, shpesh një vijë e vetme drite është e mjaftueshme që shtëpia të “marrë frymë”.
shutterstock
Çfarë duhet pasur parasysh
• Nëse dritat do t’i vendosni jashtë (rreth derës apo në ballkon), sigurohuni që janë të përshtatshme për përdorim të jashtëm - rezistenca ndaj ujit është shumë e rëndësishme për shkak të lagështisë dhe borës.
• Brenda shtëpisë, vendosini dritat larg materialeve të ndezshme (perde, tekstile, bimë të thata) dhe shmangni kombinimin me qirinj ose flakë të hapur - rrit rrezikun e zjarrit.
• Nëse keni fëmijë ose kafshë shtëpiake - shmangni dritat me kabllo të ulëta dhe të lehta për t’u tërhequr.
shutterstock
Dritat e Vitit të Ri mund t’i përdorni edhe në dhomën e gjumit, sepse drita e zbutur krijon një atmosferë shumë relaksuese, madje të përshtatshme edhe për gjumë. Sipas ekspertëve, gjëja më e rëndësishme është që ndriçimi festiv të përshtatet harmonishëm me hapësirën dhe të mos ekzagjerohet. /Telegrafi/
