Low: Franca është favorite

Gjermani-Francë konsiderohet nga të gjithë si finalja e parakohshme e këtij kompeticioni, me fituesen e këtij çifti që me datë 10 korrik do të jetë favoriti i madh për fitimin e Kupës.

Franca si vend organizator mund të ketë në anën e saj tifozët, por Gjermania, është kampionia e Botës në fuqi dhe gjithashtu skuadra që ka fituar më shumë këtë trofe bashkë me Spanjën, nga 3 herë.

Për Joachim Loew sfida me francezët do të jetë një sfidë dhe ndaj sulmit më të mirë të kompeticionit por dhe skuadrës që niset favorite në këtë përballje.

“Mendoj se Franca është skuadra që etiketohet nga të gjithë si pretendentja kryesore, por këtë realisht e besoj dhe unë. Besoj se ata do të zbresin në fushë me të gjithë dëshirën për të arritur në finale pasi luajnë përpara publikut të tyre dhe ne do të përpiqemi të ndryshojmë parashikimet në fushën e lojës”.

“Aktualisht Franca ka sulmin më të mirë të turneut, por dhe ne jemi mbrojtja më e mirë, ndaj besoj se do të shohim një 90 minutësh të bukur. Gjithsesi më duhet të them se Franca nuk ka patur kundërshtarë të vështirë deri në këtë fazë”.

“Gjermania është skuadra më e vështirë deri në këto momente që i ka rezervuar shorti. Në nëntor në ndeshjen e fundit që ne luajtëm mes nesh ndodhi diçka e pazakontë, diçka që nuk kishte lidhje me futbollin. Dhe francezët u kujdesën shumë për ne, në atë sfidë. I falënderoj për këtë, por kur të zbresim në fushë, gjatë ndeshjes do të ketë vetëm rivalitet mes nesh, rivalitet që do të përcaktojë kush është më i miri në planin sportive”.