Lisa Sahatçiu, pianistja 14 vjeçare e shpërblyer edhe me çmime ndërkombëtare (Video)

Ndërkohë që shumica e fëmijëve në moshë të saj argëtohen nëpër qendrat e ndryshme të lojërave, ajo përgatitet vazhdimisht për festivalet e ndryshme.

8 vite me radhë ka ushtruar në instrumentin e pianos, kështu duke mësuar teknikat e ndryshme të saj.

Çdo interpretim në këtë instrument, ajo e përcjell me emocione e ndjenja.

14 vjeçarja, Lisa Sahatçiu ka thënë se luajtja në piano, i sjellë relaksim dhe qetësi shpirtërore.

“Kam tetë vjet që luan në piano, përkatësisht nga mosha gjashtë vjeçare. Kjo ide ishte e prindërve, pasi unë në fillim ushtroja balet dhe gjatë ushtrimeve më pëlqente shumë muzika që luhej. Kjo ishte ajo që prindërit e vërejtën dhe vendosën që unë të vazhdoja mësimet në shkollën e muzikës “Prenk Jakova”, deklaron për RTV Dukagjinin, Lisa Sahatçiu.

Ajo ndjek mësimet në shkollën e muzikës, ku çdo ditë e më shumë dëshmon se është një talente e rrallë në këtë instrument.

Ndërsa sot ajo ka vendosur të na interpretoj disa pjesë të muzikës së Shopen.

“Deri tash besoj se kam arritur në një nivel mjaft të mirë edhe kam arritur që të luaj vepra të shumta. Me kalimin e kohës më ushtrime të ndryshme kam përparuar në aspekte të ndryshme sa i përket pianos”, shton më tej Lisa Sahatçiu.

Edhe pse e re në moshë, në bagazhin e saj muzikor gëzon shumë çmime, të cilat i ka fituar nëpër festivalet e ndryshme.

“Në vitin 2013 në garat “Pianisti i ri” në Kosovë, u shpërbleva me vendin e parë. Në vitin 2014 në garat e pianos në Shqipëri, fitova çmimin e dytë…Kam fituar edhe çmimin “Instanbul 2017”, që më ka mundësuar një koncert në Stamboll. Në vitin 2018 fitova çmimin e parë që më mundësoi një koncert me Filharmoninë e Kosovës”, shprehet më tej Lisa Sahatçiu.

Edhe pse pianon e ka hobi, Lisa Sahatçiu beson se një ditë atë do ta kthej në profesion, dhe do të bëhet një pianiste e njohur./RTV Dukagjini/Telegrafi/