LG Electronics, me seli në Korenë e Jugut, tha të martën se ka nënshkruar një marrëveshje me firmën inxhinierike DATAVOLT për të zhvilluar zgjidhje ftohjeje për një qendër të re të të dhënave me inteligjencë artificiale në Arabinë Saudite.
Qendra e të dhënave do të ndërtohet në Oxagon, qendra industriale e projektit ambicioz NEOM City të Arabisë Saudite, transmeton Telegrafi.
Sipas memorandumit të mirëkuptimit, LG do të furnizojë teknologji të menaxhimit termik, duke përfshirë 'ftohës' në shkallë të gjerë dhe sisteme shpërndarjeje të ftohësit.
Kompania koreano-jugore tha se partneriteti është në përputhje me strategjinë e saj më të gjerë "One LG Solution", e cila shfrytëzon ekspertizën nga i gjithë Grupi LG dhe hap derën për bashkëpunim me LG Energy Solution për sistemet e baterive dhe LG CNS për projektimin, ndërtimin dhe funksionimin e qendrave të të dhënave.
DATAVOLT është e vendosur në Arabinë Saudite dhe përqendrohet në ndërtimin e qendrave masive të të dhënave të mundësuara nga energjia e rinovueshme dhe lëndët djegëse alternative. Qendra e të dhënave me inteligjencë artificiale në Oxagon do të jetë ndër më të mëdhatë dhe më të sofistikuara në Arabinë Saudite.
Duke komentuar kontratën me DATAVOLT, kreu i LG Electronics, William Cho, theksoi "potencialin e madh të Lindjes së Mesme dhe Afrikës".
“Lindja e Mesme ofron shumë mundësi për biznesin qeveritar dhe të korporatave falë ristrukturimit të industrisë dhe projekteve të mëdha të zhvillimit”, shtoi Cho. /Telegrafi/
