Lekaj: Qeveria Kurti e rehabilitoi Nexhat Krasniqin

Deputeti nga radhët e Aleancës për Ardhmërinë e Kosovës (AAK), Pal Lekaj ka thënë se Nexhat Krasniqi, shef i Prokurimit në Ministrinë e Infrastrukturës, që SHBA-ja e ka futur në listë të zezë, sa ishte AAK-ja në Qeveri e kishte larguar nga detyra.

Ai ka shtuar se Lëvizja Vetëvendosje, kur ka qenë në pushtet AAK-ja, Nexhat Krasniqin e ka quajtur ‘baba i tenderëve’.

“Në kohën tonë, Qeverinë Haradinaj dhe unë si ministër i Infrastrukturës, e kemi pas larguar nga detyra. Tash LVV kur është në pushtet, harruan dhe atë që e kanë thënë po e përbijnë dhe po vazhdojnë t`i bëjnë gjithë ato gjëra që nuk janë të pranueshme as për qytetarët por as për neve si ish qeveritarë dhe më në fund e rehabilituan Nexhat Krasniqin”, tha Lekaj, në emisionin “Kallxo Përnime”.

Sipas tij, Qeveria ka heshtur pas publikimit të listës së zezë nga SHBA-ja që Krasniqi është aty.

Lexo po ashtu SHBA i vendos sanksione Nexhat Krasniqit, ish-drejtorit të Departamentit të Prokurorimit në Ministrinë e Tregtisë

“Përpos asaj që kemi informacione nga mediat se Krasniqi është pezulluar nga puna, nuk kemi ndonjë reagim tjetër nga Qeveria. Pse po heshtin? – Sepse kanë gabuar me rehabilitimin e tij (Nexhat Krasniqit) dhe po gabojnë çdo ditë me veprimet dhe vendimet që po i ndërmarrin çdo ditë. Ajo që duhet ta themi është që kjo Qeveri ka ardhur ta luftojë korrupsionin, por janë larg atyre premtimeve që i kanë dhënë para qytetarëve dhe i kanë mashtruar, pas marrjes së pushtetit kanë heshtur”, ka thënë Lekaj.

Ndryshe më datën 3 të këtij muaji, Nexhat Krasniqi, shef i Prokurimit në Ministrinë e Infrastrukturës, është futur në listën e të sanksionuarve të Departamentit Amerikan të Shtetit, duke iu ndaluar hyrja atij dhe dy fëmijëve të tij.

Nexhat Krasniqi me vendim të Departamentit Amerikan të Shtetit është sanksionuar si i “papërshtatshëm për hyrje në Shtetet e Bashkuara, për shkak të përfshirjes së tij në korrupsion të madh”- ndërlidhur me rastin e Parkut Industrial në Drenas.