Le të çirren të humburit e historisë

Spartak Ngjela

Policia speciale e Shqipërisë ka qenë në krye të detyrës së vet kur vrau terroristin grek. Shqipëria është e pacenueshme. E shihni si janë katandisur pushtuesit anadollas grekë që vijnë në Shqipëri me terroristë injorantë të përsërisin historinë e turpshme aneksioniste të vitit 1913? Grekëve iu ra dhe një “dëshmor” në Shqipëri. Se donte të vriste shqiptarët për të “çliruar Vorioepirin”. Turp. Kjo është një pjesë e re e turpit 200-vjeçar të politikës greke. “I vrari qenkësh shqiptar në origjinë”, më tha dikush. “Po ku ka grekë?! Grekë nuk ka në Athinë dhe këta vijnë në Shqipëri që të gjejnë grekë me shqiptarë të shitur”, i thashë unë.

I.

Edhe grekët, edhe serbët janë në hall. Po ringrihet me aleanca të forta Shqipëria. Po i tremb deri në çmenduri krijimi i Shqipërisë etnike. Po çirren si të marrë, se nuk ka kush t’i mbështetë me gënjeshtrat e tyre veç Rusisë. Janë të humbur. Prandaj dërgojnë terroristë të blerë për të provuar pulsin që të krijojnë destabilizim në Shqipëri, se e dinë që kjo është edhe kërkesa e korrupsionit shqiptar.

II.

Një turp historik është edhe lejimi i varreve të ushtarëve grekë në Shqipëri. Është kjo një shenjë direkte e vasalitetit të korrupsionit kryeministror shqiptar për të shitur interesin kombëtar. Nuk është dëgjuar që pushtuesi të krijojë varreza ushtarësh në vendin që ka dashur të pushtojë. Këtë e ka lejuar vetëm korrupsioni kryeministror i të dy krahëve të politikës shqiptare që iu ka dhënë varreza ushtarësh të vrarë, në shtetin që ata kanë dashur të pushtojë. Turp historik. Politika e çmendur greke është në hall, sepse historiografia amerikane dhe gjermane po iu çjerr maskën, atyre që kanë 200 vjet që falsifikojnë historinë. Kanë qenë hordhi antishqiptare që kanë shtypur shqiptarët në Greqi, kanë bërë gjenocid antishqiptar në Çamëri, kanë pushtuar territoret shqiptare me histori të stisur.

Por, tani janë në fund. Këta që çirren nëpër sheshe kundër shqiptarëve janë të ardhur nga Anadolli dhe nga vendet arabe, dhe si gjithmonë, po i tmerron autoktonia e shqiptarëve. Të gjithë në 150 vjet rresht, janë sjellë këtu nga politika e turpshme greke dhe nga kisha greke, që të shuajnë racën shqiptare. Por, i morën të keqen. Janë të humburit historikë, dhe tani, të dehur nga tërbimi i humbjes, po kërkojnë revansh patologjik. Por, nuk kanë forcë. Këta pushtues imagjinarë të Shqipërisë së Jugut që kanë krijuar me fantazi të ligë dhe injorante Epirin grek, e dinë tani që do të nisë çështja e Çamërisë dhe shqiptarëve që janë terrorizuar në Greqi. Dhe kjo i tmerron. Epiri është Çamëri, është shqiptar dhe Shqipëri, zotërinj! Dhe sigurisht që është historia jonë. Janë të humbur.

III.

Shqiptarët duhet të rrinë të qetë. Le të çirren të humburit e historisë; janë aleancat e shqiptarëve me fuqitë botërore që do të rivendosin realisht drejt padrejtësitë historike që u janë bërë shqiptarëve. Sot bota shqiptare në Ballkanin Perëndimor është domosdoshmëri e zhvillimit të vetë Perëndimit dhe garancia e domosdoshme e politikës amerikane në rrafsh botëror. Sot në Ballkanin Perëndimor janë tetë milionë shqiptarë pa llogaritur shqiptarët e Greqisë dhe ata, që janë në Turqi. Shqiptarët triumfuan përfundimisht si arbër, dhe nuk kanë të ndalur në ecjen e tyre. Kukuvajkat e erdha nga Anadolli dhe Arabia do të përfundojnë shumë keq po vijuan me të tilla provokime. Kurse historia jonë duhet urgjentisht të lajë hesapet më korrupsionin kryeministror shqiptar, sepse këta hajdutë brenda Shqipërisë janë grupuar që të shkatërrojnë interesin shqiptar.