Lidhja Demokratike e Kosovës ka kritikuar Qeverinë Kurti për rrezikim të shëndetit të qytetarëve, pas tollovisë që ndodhi sot në sallën “1 Tetori”.
Anëtarja e kryesisë së LDK-së, Sibel Halimi tha se pamjet e sotme janë skandaloze.
“Jemi zgjuar me pamje skandaloze nga salla 1 tetori në Prishtinë jemi dëshmitar dhe po e përcjellim me shqetësim sesi qytetarët po grumbullohen me shpresën që kjo qeveri do të realizoj vaksinimin”, tha Halimi në konferencë për media.
Në anën tjetër, ish-ministri i Shëndetësisë, Armend Zemaj tha se Qeveria Kurti sot i dërgoj qytetarët drejt vdekjes.
“Jemi adresuar para pak ditësh dhe kemi saktësuar keq-menaxhimin e kësaj qeverie me pandeminë. Edhe sot duke drejtuar prindërit tanë drejt vdekjes, në vend që të drejtohen drejt vaksinimit dhe sigurimit të jetesës në luftimin e pandemisë, sot nga papërgjegjësia totale qeveria e udhëhequr nga Albin Kurti dhe ministri Arben Vitia sot ka rrezikuar qytetarët e Kosovës, duke rrezikuar drejtpërdrejt jetën e tyre”, ka thënë Zemaj.
Ai ka shtuar se kjo tregon se këta njerëz nuk e kanë prioritet shëndetin.
“Kjo tregon se i kanë mashtruar qytetarët për ndryshim. Me urdhër të qeverisë nuk është lejuar të pasqyrohet kjo gjendje, dhe nuk mund të fshihet e vërteta çka ka ndodhu sot.”, ka thënë Zemaj.
Zemaj ka shtuar se grumbullim të qytetarëve ka edhe në komuna përkatëse, dhe se ka mungesë të vaksinave.
Edhe Ardian Shala nga departamenti i shëndetësisë në LDK kritikoi Qeverinë Kurti për mungesë të një plani konkret për vaksinim.
“Asnjë plan konkret për sigurim të vaksinave e as vaksinim. Si pasojë e kësaj patëm sot këto pamje në sallën “1 Tetori”. Qytetarët nuk meritojnë një trajtim të tillë”, tha ai. /Telegrafi/
