Lavrov pro “Ballkanit të Hapur”, Abazi: A do të thotë kjo se kushdo që mbështet këtë nismë mbështet edhe shkatërrimin e Ukrainës?

Kryetari i Komisionit për Punë të Jashtme i Kuvendit të Kosovës, Haki Abazi ka reaguar sot lidhur me përkrahjen që i ka dhënë ministri i Jashtëm rus, Sergei Lavrov iniciativës “Ballkani i Hapur”, e për të cilën tha se është nismë e Beogradit.

Abazi në një postim në Twitter shkruan se meqenëse Lavrov e mbështetë “Ballkanin e Hapur”, ndërkohë që shkatërron Ukrainën, a do të thotë kjo se kushdo që mbështet këtë nismë e mbështetë po ashtu edhe shkatërrimin e Ukrainës.

“Kur Lavrov mbështet konkretisht ‘Ballkanin e Hapur’, ndërkohë që po shkatërron hapur Ukrainën, a do të thotë kjo se kushdo që mbështet ‘Ballkanin e Hapur’ po mbështet gjithashtu shkatërrimin e Ukrainës! Dhe çfarë është në të vërtetë Ballkani i Hapur?”, shkruan Abazi.

When Lavrov specifically supports Open Balkans, while is openly destroying Ukraine, does that mean that anyone who supports Open Balkans is also supporting destruction of Ukraine! And what is Open Balkans anyhow? #UkraineUnderAttack

— Haki Abazi (@AbaziHaki) June 7, 2022

Ndryshe, ministri i Jashtëm rus, Sergei Lavrov ka deklaruar se Rusia e mbështet iniciativën e “Ballkanit të Hapur”, për të cilën tha se është nismë e Beogradit.

Lexo po ashtu Deklarata e Lavrov për “Ballkanin e Hapur”, Arifi: Konfirmim i supozimeve të Kosovës që në këtë nismë do të ketë elemente pro-ruse

Siç raportuan mediat serbe Lavrov u shpreh se “udhëheqësit e Brukselit nuk donin të konfirmonin qëndrimin e Rusisë për Kosovën dhe BeH, për të shprehur mbështetjen për nismën e Beogradit për Ballkanin e Hapur dhe për të diskutuar interesat për përmirësimin e marrëdhënieve midis vendeve të rajonit”.

Më 7 dhe 8 qershor në Ohër të Maqedonisë do të mbahet takimi i radhës i “Ballkanit të Hapur”. /Telegrafi/