Ky është senatori katalonas që kërkoi në Senatin e Spanjës njohjen e Kosovës (Video)

Senatori Jordi Martí ka kërkuar nga Spanja njohjen e pavarësisë së Kosovës dhe njohjen e pasaportave të Kosovës, në mënyrë që qytetarëve të Kosovës tu lejohej futja në Spanjë, në rast të liberalizimit të vizave nga Bashkimi Evropian.

Jordi Marti është senatori spanjoll i cili ngriti sot zërin në Senatin e Spanjës për njohjen e Pavarësisë së Kosovës nga Spanja.

Marti, i cili është senator që nga viti 2015, ka dorëzuar në Senat një mocion për njohjen e pavarësisë së Kosovës nga Spanja, derisa ka arsyetuar nismën e partisë së tij, E Majta Republikane e Katalonisë (ERC).

Ky mocion për njohjen e Kosovës megjithatë u hodh poshtë në Komitetin për Punë të Jashtme të Senatit spanjoll, me votat e Partisë Popullore të Spanjës dhe Partisë Socialiste të Punëtorëve të Spanjës.

Senatori Jordi Martí ka kërkuar nga Spanja njohjen e pavarësisë së Kosovës dhe njohjen e pasaportave të Kosovës, në mënyrë që qytetarëve të Kosovës tu lejohej futja në Spanjë, në rast të liberalizimit të vizave nga Bashkimi Evropian.

Ai bëri thirrje gjithashtu për mbështetjen e Kosovës në Organizatën e Kombeve të Bashkuara (OKB) dhe për anëtarësimin e Kosovës në këtë organ, njofton Insajderi.

Marti kujtoi para Senatit të Spanjës se vetëm pesë vende të BE-së – Qiproja, Rumania, Greqia, Sllovakia dhe Spanja – nuk e njohin Kosovën dhe se Parlamenti Evropian së fundmi ka miratuar një projektrezolutë për njohjen e Kosovës me 403 vota pro dhe 103 kundër.

“Kjo kërkesë nga BE-ja rrit presionin mbi shtetin spanjoll dhe gjithashtu presionin mbi gatishmërinë e saj për të ndihmuar në normalizimin dhe stabilizimin e marrëdhënieve ndërmjet Kosovës dhe Serbisë”, shtoi Marti.

Jordi Martí Deulofeu, i lindur më 1977 është një politikan katalunas, shtetas spanjoll, i cili mban pozitën e kryetarit të komunës së Sant Pere Pescador dhe është senator në Senatin e Spanjës nga radhët e partisë së Majtë Republikane të Katalonisë.

Ai ka diplomë në Shkenca Politike dhe Administratë, me një master për menaxhim.

Në zgjedhjet e përgjithshme të viteve 2015 dhe 2016 ai u zgjodh senator për krahinën e Gironas si kandidat i pavarur në radhët e partisë së Majtë Republikane të Katalonisë.