Kusari-Lila: Pse të kërkohet interpelancë për faljen e gjobave të parapara me ligj?

Ushtruesja e detyrës së shefes së Grupit Parlamentar të Lëvizjes Vetëvendosje (LVV), Mimoza Kusari-Lla iu ka kundërpërgjigjur propozuesit të interpelancës për faljen e gjobave antiCOVID, Besnik Tahirit nga Aleanca për Ardhmërinë e Kosovës (AAK), duke i thënë se gastronomia nuk është mbyll për 12 ditë por siç tha ajo është kufizuar.

Kusari-Lila tutje kritikoi kërkesën e AAK-së për interpelancë pasi në tekst të kërkesës thuhet se “Qeveria është agresive ndaj gastronomisë”.

“Gastronomia nuk është mbyll për 12 ditë, por është kufizuar. Hoteleria ka qenë e mbyllur, gjegjësisht dasmat. Në tekst shkruhet se qeveria është agresive ndaj gastronomisë, e pa saktë sepse virusi ka qenë agresiv e jo qeveria”, ka thënë ajo.

Sipas saj, është plotësisht e kuptueshme që opozita t’i rri gardianë e qeverisë, por që opozita të evitojë ligjshmërinë është e papranueshme.

“I njëjti grup parlamentar në amendament për ligjin e rimëkëmbjes propozoi dy amendamentet për kompanitë fitimprurëse. E njëjta ndodhi me Trepçën, ku argumenti i ministrit të AAK-së ishte se e kishte për Trepçën, kur pyesim KPMM thonë se Trepça nuk paguan, por vetëm Ferronikeli. Vlera e atij amendamenti i ka kushtua buxhetit të shtetit është 30 milion euro”, u shpreh ajo.

Kusari-Lila po ashtu theksoi se pajtohet që bizneset duhen ndihmuar dhe që Qeveria duhet të sjellë pakon ekonomike.

“Absolutisht pajtohem që bizneset duhen ndihmuar, dhe qeveria duhet të sjell pakon ekonomike. Kemi një rënie të vdekjeve, rënie të rasteve aktive, dhe çka kemi kërkesë për të evituar ligjshmërinë. Të gjithë ata që e kanë paguar gjobën duhet falënderuar pasi kanë kontribuar në ligjshmërinë e shtetit”, u shpreh ndër të tjera ajo. /Telegrafi/