Kusari-Lila: Ekipi negociator forcon pozitën e Thaçit në dialog

Deputetja e Alternativës, Mimoza Kusari-Lila ka kritikuar vendimet e Kuvendit për miratimin e Ligjit të Pagave, dhe gjithashtu Ligjit për dialogun.

Në një postim në Facebook, Kusari-Lila fillimisht ka uruar nxënësit për rifillimin e procesit mësimor.

Sipas saj, nxënësit u maltretuan nga vendimet e gabuara që po merren në Kosovë, transmeton Telegrafi.

“Një javë të mbarë për të gjithë dhe në veçanti mbarësi për shkollarët tanë të cilët për tri javë ishin peng i politikës së keqe të Kosovës. Fund e krye u malltretuan dhe pësuan si rezultat i secilit vendim të gabuar që u morr në këtë vend në të cilin e pësuan më të vegjlit”, ka shkruar Kusari-Lila.

Duke folur për vendimet e Kuvendit në ditën e shtunë, ish-kryetarja e Gjakovës ka vlerësuar se Ligji i Pagave është abuzuar.

Përderisa për Ekipin negociator ajo ka thënë se vetëm e forcon pozitën e Thaçit në dialog.

“Njëkohësisht, ju kërkoj ndjesë të gjithëve për banalitet dhe vendimet e bastarduara të Kuvendit të Kosovës. Prej abuzimit që u bë me Ligjin e pagave e deri tek zyrtarizimi i delegacionit shtetëror për dialogun, i cili nuk bëri asgjë më shumë përveq se forcoi poziten e Thaçit në dialog. Uroj qē shkollarët të mos e kenë humbur besimin në dije, shkollë dhe punë”, ka shkruar Mimoza Kusari-Lila.

Ndryshe, pas një seance të gjatë Kuvendi të shtunën ka miratuar edhe Ligjin për Buxhet dhe atë për Trepçën. /Telegrafi/