​Kurti: Punësimi në Kosovë është rritur për 20 për qind

Nga 7500 aplikues për grante për biznese, 901 aplikues kanë përfituar nga Programi për Zhvillim Rajonal të Balancuar 2024, me vlerë prej shtatë milionë euro.

Në ceremoninë e nënshkrimit të kontratave me përfituesit nga PZHRB 2024, kryeministri i vendit, Albin Kurti, ka thënë se Qeveria e Kosovës është e përkushtuar që të mbështes sektorin privat, i cili është një faktor i rëndësishëm i punësimit dhe rritjes ekonomike të vendit tonë.

Albin Kurti ka shtuar se ky program ka për qëllim zhvillimin socio-ekonomik të barabartë, përmes krijimit të vendeve të reja të punës dhe rritjes së bizneseve të reja e prodhuese.

“Qeveria e Republikës së Kosovës është e përkushtuar që të mbështes sektorin privat i cili është një faktor i rëndësishëm i punësimit dhe i rritjes ekonomike në vendit tonë. Krahasuar me vitin 2021, tash që po flasim më 2024,  bruto produkti vendor është për 1/3 më i lartë. Buxheti shtetëror vjetor është për 35 për qind më i lartë. Kjo është përkthyer sigurisht me punësim të shtuar, ku krahasuar me para 3 vjetëve, në Kosovë është rritur punësimi për 20 për qind, përfshirë këtu edhe dyfishimin e të rinjve të punësuar. Padyshim që kjo ka ndikuar edhe në rritjen e fitimit dhe zgjerimin e aktivitetit të sektorit privat”, ka thënë Kurti në fjalimin e tij.

Ai ka shtuar se vitin e kaluar për zbatimin e masës 2.2 të pakos së ringjalljes ekonomike, përkatësisht mbështetjes së bizneseve për qasje në financa, kemi ndarë 5.5 milionë euro për bizneset.

“Nga viti 2021, e deri në vitin aktual 2024, janë përkrahur 901 projekte me vlerën rreth 7 milionë euro. Ndërmarrja e iniciativës së programit për zhvillim rajonal të balancuar, ka për qëllim zhvillimin socio-ekonomik të barabartë, përmes krijimit të vendeve të reja të punës, e rritjes së bizneseve të reja e prodhuese”, ka thënë Kurti.

Ndërsa, ministri i Zhvillimit Rajonal, Fikrim Damka ka shtuar se me këtë program, kjo ministri po investon në të ardhmen e Kosovës, duke siguruar se asnjë rajon të mos mbetet mbrapa.

“Ky është një moment që reflekton angazhimin tonë të palëkundur, për të forcuar dhe mbështetur çdo rajon të Republikës së Kosovës, duke bërë çdo cep të vendit tonë një vend më të mirë për të jetuar dhe punuar…

Me këtë program, ne po investojmë në të ardhmen e Kosovës duke siguruar se asnjë rajon dhe më gjerë të mos mbetet mbrapa dhe që mundësitë të jenë barabartë për te gjithë… Gjatë periudhës 2021-2024 programi për zhvillim rajonal të balancuar ka pasur një sukses të jashtëzakonshëm me gjithsej 7 mijë e 500 aplikime dhe me 7 milionë euro vlerë”, ka shtuar Damka. /kp/