Kur shteti vozit në drejtim të gabuar

Imazhi i një veture të Policisë së Kosovës e cila me shpejtësi të madhe po ecte nëpër shiritin e gabuar të autostradës Merdar-Morinë, pati reflektime të ndryshme në mediat shqiptare. Por, gallata më e madhe ishte nëpër rrjetet sociale. Disa thoshin se kjo është një video e rrejshme, veç një barsoletë e zakonshme ku përflitet inteligjenca dhe përgatitja profesionale e efektivit të policisë, ndërsa të tjerët e shohin si rrezikim të sigurisë në komunikacion.

Sido që të jetë, komunikata zyrtare pakkënd e bindi se shteti po e bënë punën e vet. Lajmi thotë se nëpër autostradën e kombit, një patrullë e policisë po e ndiqte dikë duke vozitur në drejtim të kundërt. Policia e “zellshme” ishte vënë në ndjekje pas disa hajnave të imtë, ndërkohë që siç vërejnë kujdestarët në facebook, hajnat e mëdhenj me eskortë, me përcjellje zyrtare të policisë, ecin të papenguar rrugës së vet.

E përse të mos ecin? Tash është koha e pushimeve dhe shteti është në pushim, ndërkohë policia mban kondicionin duke vozitur në drejtim të kundërt. Shteti në pushim e pushteti në fushatë. Një fushatë sapo është mbyllur dhe tjetra pret të hapet. Portalet janë mbushur me humor për “shacat” dhe të pasmet e këngëtareve të cilat më shumë se për talentin për këngë dallohen për asetet e tyre.

Policia u fut krejt papritmas në këtë kolumne, sepse u bë hit virtual duke kryer punën e vet me zell të tepruar dhe rrugë të gabuar, nëkohën kur gjithçka shkon në drejtim tjetër.

Përndryshe, nëpër rrjetet sociale deputetët e zgjedhur në legjislativin qendror kanë filluar komedinë e quajtur hyrje në fushatën elektorale për pushtetin lokal. Shumëkush do ta krahasonte edhe këtë parafushatë me veturën e zellshme, tepër të zellshme të policisë e cila në mënyrë paradoksale e shpërfaq pushtetin e krimit në këtë vend.

Kështu, deputetët e partisë më të përfolur për korrupsion dhe punësime politike, si duket i kanë mbledhur kritikat e deridjeshme ndaj tyre dhe i kanë vënë adresë të re duke e drejtuar kështu krejt fushatën kundër pushtetit lokal në Komunën e Prishtinës, për të zbehur kështu sadopak idenë me të cilën ata dolën si partia më e votuar në vend. Ideja bazë e tyre ishte se pushteti ishte i korruptuar, se ai ishte biznesmeni kryesor në vend dhe se ishte i “kapur” nga krimi. Pra pushteti e kishte kapur shtetin dhe nuk linte që të ndërrohej me rrugë demokratike.

Lufta virtuale PDK-Vetëvendosje përbën kurrizin e fushatës së ardhshme për zgjedhjet lokale, por edhe një luftë të ashpër për krijimin e qeverisë qendrore për të cilën koalicioni PAN i udhëhequr nga Partia Demokratike pretendon të drejtën e pakontestueshme edhe pse nuk i ka numrat, pra nuk ka votat e mjaftueshme pa e thyer barrierën morale që është vendosur në mes tyre dhe Vetëvendosjes e cila si partia me më shumë vota konsideron veten fituese morale e këtyre zgjedhjeve.

“E përjetuam edhe këtë, që Partia Demokratike të përflas dikë për korrupsion dhe punësime të militantëve”, po thoshte një qytetar duke e përcjell lajmet e ditës ku lexuesi i lajmeve në televizion, përplot eufori po citonte postimet në Facebook të një deputeti të kësaj partie.

“Në ndërmarrjet publike dhe në institucione, punësimet gjithnjë janë bërë nga pushteti dhe kjo është traditë që nga koha e Lidhjes Komuniste të Kosovës. Madje, edhe viteve të ‘90-ta punësimet në arsim dhe institucionet paralele ishin me direktiva partiake”, po i vihej përballë në debat një mik i tij. “Pas luftës krejt kjo rrodhi ngjashëm. Ndarja e pushtetit politik reflektohej proporcionalisht në punësime”.

Ma mbaj djalin, po i thoshte nusja vjehrrës, se po vjen ajo e përdala. Po e shaj unë e para, se kjo ashtu e kështu do të më shaj. Dhe nusja e shkruan një status të fortë. E shau përpara. Tash duke ndjekur këtë logjikë, kush shan i pari është në rregull?!
Pushteti i sharë ka filluar të dëshmojë se ka kapacitete të shajë më shumë se opozita. Mjafton që krejt kjo të përsëritet pafundësisht dhe llogaritet se qytetari do të humbë orientimin. Nëse të gjithë janë njëjtë, pse na duhen ndërrimet? A janë të gjithë njëjtë?

Si të themi: disa në disa mandate e kanë dëshmuar se janë, e disa ende nuk kanë pasur rast!