Bislimi: Kryeministri serb ia bëri të qartë BE-së se nuk ka Marrëveshje Bazike

Kryeministri i Serbisë, Milosh Vuçeviq, në seancën e Parlamentit të Serbisë, ka thënë se Republika e Serbisë nuk e ka pranuar planin franko-gjerman, për normalizimin e marrëdhënieve mes Kosovës dhe Serbisë.

Kryeministri serb, duke përsëritur se pala serbe nuk e ka nënshkruar atë plan, ka thënë se është e papranueshme për Serbinë pranimi i një Kosove të pavarur.

“Nuk e kemi nënshkruar dhe kemi bërë deklarime të qarta dhe kemi thënë shumë qartë se është e papranueshme çfarëdo implikimi implicit dhe eksplicit i një të ashtuquajture Kosovë e pavarur. Është një vijë e kuqe për Republikën e Serbisë. A mund të flasim? Do të flasim. Ne po përdorim çdo hapësirë manovrimi për ta përdorur në mënyrë që shtetin të mos na e varrosin për të disatën herë në historinë e kohërave të fundit, të mos na ndjekin, të mos na dënojnë, të mos na sanksionojnë”.

“Në mënyrë që të mos humbim diçka vërtetë me vlerë, duke mbrojtur gjithashtu diçka shumë me vlerë për qytetarët e Kosovës. Dhe vetëm kuptoni pak se nuk duhet që të gjitha kartat gjithmonë t’i tregojmë publikisht, sepse është kundërproduktive për pozitën e Serbisë”, ka thënë kryeministri serb, transmeton Telegrafi.

Serbia’s PM asking EUSR & EEAS: What else is needed to convince you that for Serbia there is no Basic Agrmt? That their participation in the dialogue is faked just to avoid eventual sanctions? How many more drafts of sequencing plans we need before revealing the truth to all MS? pic.twitter.com/neC56DI3rV

— Besnik Bislimi (@BislimiBesnik) July 24, 2024

Ndaj, fjalimit të kryeministrit serb ka reaguar zëvendëskryeministri i Kosovës, Besnik Bislimi, i cili përmes një postimi në rrjetin social “X”, ka shtruar disa pyetje për Përfaqësuesin Special të Bashkimit Evropian në Dialog, Miroslav Lajçak dhe përfaqësuesin e Lartë të BE-së për Politikë të Jashtme, Josep Borrell.

“Çfarë nevojitet më shumë për t’iu bindur se për Serbinë nuk ka Marrëveshje Bazike? Që pjesëmarrja e tyre në dialog është fallco vetëm për të evituar sanksione eventuale? Edhe sa drafte të planit të sekuencimit na nevojiten derisa t’iu shfaqet e vërteta shteteve anëtare?”, ka shkruar Bislimi. /Telegrafi/