Rasti “Panda” në Pejë, Kurti: Serbia fsheh të kaluarën kriminale dhe vazhdon të mohojë krimet në Kosovë

Vrasja e 6 të rinjve serbë në kafeterinë “Panda” në Pejë, në vitin 1998, ishte një krim, faktet e zbardhjes dhe autorët e të cilit janë fshehur shumë vite nga shteti i Serbisë

Më 14 dhjetor 1998, shërbimet serbe ekzekutuan të gjashtë të rinj serbë për të akuzuar rrejshëm UÇK-në si fajtore.

“Nuk ka asnjë provë që është kryer nga shqiptarët”, kishte deklaruar presidenti i Serbisë Aleksandar Vuçiq në vitin 2013.

“Ka shumë gjëra të tmerrshme me të cilat do të na duhet të përballemi, siç është vrasja e serbëve në kafiterinë Panda”, kishte shtuar ai.

Serbia i vrau gjashtë të rinj serb, të moshave 14, 16, 17, 18 dhe 24 vjeç, në përpjekjen e regjimit të Millosheviqit për të justifikuar gjenocidin në Kosovë.

Lexo po ashtu Musliu: Askush s’u dënua për rastin “Panda”, Serbia ende fabrikon raste e vret njerëz

Këtë e ka thënë në vitin 2014 edhe Vuk Drashkoviq, duke akuzuar shërbimin sekret serb për krimin në “Panda”, duke veçuar Radomir Markoviq dhe Milorad Ulemek Legija, ish-komandant i Njësisë së Operacioneve Speciale (JSO).

Krimi është kryer që UÇK-ja “të paraqitet si organizatë terroriste” për të “ngjallur ndjenjat antishqiptare” dhe për të justifikuar veprimet e ardhshme të forcave serbe”, kishte thënë Drashkoviq.

Kryeministri Albin Kurti kujton se pas këtij sulmi, forcat serbe arrestuan më shumë se 150 shqiptarë në Pejë.

Më 17 dhjetor 1998, u arrestuan dhe torturuan në mënyra çnjerëzore edhe Agron Kollçaku, Behar Bajri, Beqir Loxha, Gazmend Bajrami, Vllaznim Pergjegjaj dhe Xhevdet Bajrami.

Më i madhi prej tyre ishte 22, ndërsa më i riu 17 vjeç. Gjashtë të rinjtë shqiptarë, në nëntor 1999, gjykata në Serbi i shpalli të pafajshëm.

Kurti thotë se 26 vjet pas, shteti i Serbisë vazhdon të fshehë të vërtetën për vrasjen e të rinjve serb.

“Serbia mohon gjenocidin në Kosovë, mohon gjenocidin në Bosnje dhe Hercegovinë, mohon masakrën në Srebrenicë, edhe masakrën në Reçak. Mosnjohja e së kaluarës së saj kriminale dhe mosnjohja e pavarësisë së Kosovës janë të lidhura ngusht”, ka shkruar Kurti.

“Për paqe dhe siguri në rajonin tonë, ballafaqimi me të kaluarën dhe drejtësia për krimet e Serbisë në Kosovë janë të domosdoshme”, ka shkruar tutje Kurti./Telegrafi/