Kreu i inteligjencës ukrainase pranoi rolin e tij në sulmin në urën e Krimesë

Shtatë muaj pas shpërthimit që dëmtoi rëndë urën që lidhte gadishullin e Krimesë të pushtuar nga Rusia me territorin e saj, kreu i shërbimit të inteligjencës ukrainase konfirmoi përfshirjen në atë sulm.

“Meqenëse është një rrugë logjistike që duhej shkëputur nga armiku, ne duhej të merrnim masat e duhura”, tha Vasyl Malyuk, drejtor i agjencisë së inteligjencës së sigurisë së brendshme të SBU, në një intervistë me gazetarin ukrainas Dmytro Komarov në YouTube.

Në të njëjtën kohë, Malyuk nuk ka paraqitur detajet e operacionit. Pamjet e shpërthimit të 8 tetorit dhe zjarrit që rezultoi në urë bënë xhiron e botës. Sulmi erdhi një ditë pasi presidenti rus Vladimir Putin festoi ditëlindjen e tij të 70-të.

Shumica e vëzhguesve kanë supozuar prej kohësh se Ukraina qëndronte pas sulmit, megjithëse Kievi refuzoi të komentonte mbi të. Në dhjetor, Malyuk la të kuptohet se agjencia mund të përfshihej, transmeton Telegrafi.

Lexo po ashtu A do të furnizohet Ukraina me raketat gjermane Taurus, që kanë një rreze veprimi prej 500 kilometra dhe mund të shkatërrojnë bunkerë nëntokësorë?

Ura për në gadishullin e Krimesë u mbyll për ditë të tëra, por sot ajo është restauruar dhe është një rrugë e rëndësishme për furnizimin e ushtrisë ruse në agresionin e saj kundër Ukrainës.

Malyuk tha se Ukraina veproi në përputhje me “traditën e luftës”. Ai tha gjithashtu se në fillim të agresionit rus 15 muaj më parë, SBU krijoi një njësi speciale për sabotim në territorin ukrainas kundër armikut.

Ai theksoi se autoritetet ruse vazhduan “pseudo-hetimet” për sulmin në urë. Më shumë se 20 shtetas rusë u dyshuan dhe u arrestuan me akuzën e përfshirjes në atë sulm.

“Sulmet me dronë në tetor mbi anijet luftarake të flotës ruse të Detit të Zi në Gjirin e Sevastopolit, janë gjithashtu pjesë e një operacioni special të kryer nga SBU në bashkëpunim me forcat e armatosura ukrainase”, tha Malyuk. /Telegrafi/