Krasniqi i dëshpëruar me barazimin

Trajneri i skuadrës së Prishtinës Ramiz Krasniqi pas ndeshjes me Drenicën është shprehur i dëshpëruar me barazim duke treguar haptas se do të ishte i lumtur nëse shkarkohet.

“Lojë e plogësht, sidomos nga ana jonë, kurse Drenica normalisht është munduar të qarkullojë topin aq sa i ka pasur mundësi. Por, është e pakuptimtë një ekip sikur i joni nuk ka dëshirë, nuk ka vullnet, nuk ka motiv për të rrezikuar kundërshtarin.

“Shumë të plogësht, shumë patetik, pa dëshirë, e pakuptueshme. Për mos të qenë monoton, ky është niveli i lojtarëve, nga ky ekip ndoshta mund t’i ndash katër-pesë futbollistë nga pjesa tjetër ku nga vetë fakti se ku kanë luajtur dhe kanë ardhur në Prishtinë, është jashtëzakonisht shumë vështirë të adaptohen në Prishtinës, sepse janë shumë kërkesat e mëdha, përgjegjësi shumë e madhe, sepse kundër Prishtinës të gjithë luajnë me angazhim maksimal dhe deri sa nuk e kuptojnë këtë do ta kemi shumë vështirë.

Të jem i sinqertë, do të gëzohesha të largohem, jo tani, por shumë më herët. Por, në pyetje është mos të thuhet se Ramiz Krasniqi po frikohet. Nga fillimi kam thënë se ne nuk kemi futbollistë për vendin e parë.

“Nuk ka konkurrencë, janë nja tre-katër futbollistë, kurse të tjerët janë të veshin fanellën dhe të dalin. Ky është niveli. Normalisht, është pajtuar edhe kryesia, sepse vetë rezultati po tregon dhe deri në fund do të mundohemi të mbahemi në këto javët e mbetura, pastaj me prurjen e katër-pesë futbollistëve do të bëhet më mirë”.

“Thjesht, niveli është i ulët, në Prishtinë gjithmonë kanë luajtur futbollistë cilësor, me emër dhe normalisht kemi pasur rezultat. Kurse, tani jemi munduar të komponohemi me rini, por është jashtëzakonisht vështirë, sepse nuk po ka rezultate”, u shpreh Krasniqi pas ndeshjes.