Kostadinov: OBRM-PDUKM të mos bllokojë mbajtjen e regjistrimit të popullsisë

Zëdhënësi i partisë maqedonase në pushtet, Kostadin Kostadinov nëpërmjet një konference për shtyp tha se “për 11 vite OBRM-PDUKM bllokonte zhvillimin, reformat ndërsa tani njëlloj si në të kaluarën po përpiqet ta bëj të njëjtën”.

SIpas Kostadinov, për 11 vite OBRM-PDUKM nuk arriti të organizojë regjistrimin e popullsisë, madje edhe atë që e nisi e ndaloi për shkak të kalkulimeve politike dhe shpenzoi tre milionë euro të qytetarëve, njofton Telegrafi Maqedoni.

“Për fajin e OBRM-PDUKM-së, Republika e Maqedonisë së Veriut është i vetmi shtet në Evropë që nuk ka organizuar regjistrim të popullsisë më shumë se 16 vite. Sot, me kërkesën e anulimit të regjistrimit të popullsisë, OBRM-PDUKM dëshiron që vendi ynë të mbetet i vetmi shtet në Evropë që nuk ka zbatuar operacionin statistikor siç është regjistrimi i popullsisë”, tha Kostadinov.

Ai tha se regjistrimi i popullsisë u paralajmërua që nga viti i kaluar, ndërsa viti 2020 është vit që do të duhej të realizohet regjistrimi sipas rekomandimeve ndërkombëtare dhe se për dallim nga regjistrimi i vitit 2011, tani organizimi i regjistrimit, siç thotë Kostadinov, është transparente dhe profesionale sipas standardeve ndërkombëtare.

Lexo po ashtu OBRM-PDUKM do të kërkojë anulimin e regjistrimit të popullsisë për vitin 2021

“Regjistrimi është i rëndësishëm për marrjen e të dhënave të detajuara që janë të rëndësishme për krijimin e politikave dhe masave në nivel lokal, rajonal dhe qendror. Është e rëndësishme për përparimin dhe reformat, e rëndësishme për qytetarët dhe shtetin. OBRM-PDUKM duhet të mos bllokojë proceset që janë të rëndësishme për shtetin dhe qytetarët. Duhet të mos bllokojë regjistrimin e popullsisë. Maqedonia e Veriut nuk duhet të lejojë të jetë i vetmi shtet në Evropë pa regjistrim të popullsisë”, tha mes tjerash Kostadinov./Telegrafi/