Kosova mund ta humbë rekordmenin

Kosova rrezikon ta humbë rekordmenin botëror, Agim Agushi. Nëse presidentja Atifete Jahjaga nuk ia rezervon ndërtesën “Burk Khalifa”, zhongleri kosovar paralajmëron se do të jetë i detyruar ta zgjedhë një vend tjetër për ta përfaqësuar

Agim Agushi po përballet me probleme të cilat as që kishte menduar se do t’i shfaqeshin. Rekordmeni kosovar i zhonglimit të topit me kokë, nuk po mund ta thyejë një tjetër rekord botëror, për shkak të neglizhencës së Presidencës së Kosovës.

Atij i nevojitet një rezervim nga ana e presidentes së Kosovës, Atifete Jahjaga, në ndërtesën më të lartë në botë, Burk Khalifa në Dubai, në mënyrë që të futet prapë në librin “Guinness” duke zhongluar në të, por ai nuk ka marrë kurrfarë përgjigje nga Presidenca, edhe pse i ishte premtuar një gjë të tillë, shkruan Zëri.

“Mua më kanë thënë në Kosovë dhe në Dubai se presidentja mund të ma rezervojë ndërtesën më të lartë në botë për ta thyer një rekord të ri duke u ngjitur dhe duke zbritur shkallëve të asaj ndërtese. Ka katër muaj që kam kërkuar një takim me presidenten përmes këshilltarit të saj Arbër Vllahiu”, thotë Agushi për “Zërin”.

“Ai është zotuar se do të ma mundësojë një takim dhe se presidentja është njoftuar për rastin tim. Edhe një zyrtare e protokollit është në dijeni. Por, ka kaluar shumë kohë dhe nuk kam marrë përgjigje prej tyre”, ankohet ai.

Kjo neglizhencë mund ta detyrojë Agushin që ta thyejë këtë rekord duke e përfaqësuar një vend tjetër, pasi nuk ka zgjidhje tjetër. Ai do të presë edhe pak dhe më pas ta bëjë krenar një tjetër shtet.

“Mua nuk më ka mbetur tjetër veçse të kërkoj rrugë tjetër. Do të provoj me autoritetet gjermane apo kroate, ose të ndonjë shteti tjetër. Nëse nuk mund të kryej punë brenda këtij viti, atëherë në vitin tjetër do ta kryej, pavarësisht nëpërmjet cilit shtet, në përjashtim veç të Serbisë”, përfundoi ai.

Edhe “Zëri” e ka pyetur përmes e-mailit zëdhënësin Arbër Vllahiu rreth kësaj çështjeje, duke pritur më shumë se një javë, por ai nuk ka kthyer përgjigje. Fatkeqësisht, Kosova mund ta humbë një rekordmen botëror, shkaku i injorimit të tij, përcjell Zëri.

Agushi pritet ta thyejë një tjetër rekord botëror në muajin nëntor në Gjermani. Ai deri tash ka thyer rekorde të ndryshme botërore, duke u futur edhe në librin “Guinness”, me zhonglimin e tij me kokë, me orë të tëra, në ndërtesa të ndryshme, në vetura në lëvizje, duke ecur, i ulur etj.