Kosova e shpalli non-grata zyrtarin rus të UNMIK-ut, Andrey Nikolaevich Antonov – vjen reagimi i OKB-së

Organizata e Kombeve të Bashkuara ka reaguar pasi Kosova e shpalli persona non-grata zyrtarin rus Andrey Nikolaevich Antonov pjesë e Misionit të Administratës së Përkohshme të Kombeve të Bashkuara (UNMIK).

Zëdhënësi i sekretarit të përgjithshëm të OKB-së, Stephane Dujarric ka deklaruar se UNMIK-u ende nuk ka pranuar asnjë komunikim zyrtar nga Kosova për këtë vendim.

“Ne jemi vënë në dijeni për shpalljen ‘persona non-granata’ të një zyrtari të personelit të Misionit të Kombeve të Bashkuara në Kosovë, (UNMIK). Nuk kemi pranuar asnjë komunikim te Misioni nga autoritetet e Kosovës sa i përket këtij njoftimi”, thuhet në reagim, përcjell Telegrafi.

Lexo po ashtu Andrey Nikolaevich Antonov është zyrtari rus i UNMIK-ut i shpallur non-grata nga Kosova

Ditë më parë, ministrja e Punëve të Jashtme dhe Diasporës, Donika Gërvalla ka bërë të ditur se me kërkesë të kryeministrit Albin Kurti, ka nxjerrë vendimin për shpalljen persona non-grata të një zyrtari rus të UNMIK-ut në Kosovë.

Gërvalla tha se për shkak të veprimtarisë, ky zyrtar e ka cenuar sigurinë kombëtare të Kosovës.

Siç merr vesh Telegrafi, ky zyrtar është Andrey Nikolaevich Antonov.

Ndryshe, në rreth dy muaj më parë, presidentja e vendit, Vjosa Osmani ka bërë të ditur se janë shpallur non grata dy zyrtarë rusë. /Telegrafi/