​Konjufca në Rezallë: Nuk do të ndalemi derisa Serbia të mbahet përgjegjëse për gjitha masakrat në Kosovë

Kreyaprlamentari Glauk Konjufca, ka bërë homazhe në kompleksin e varrezave në Rezallë për të nderuar 98 martirët e masakruar nga forcat serbe.

Nga aty Konjufca tha se plagët janë ende të hapura e që edhe më e dhimbshme është se fakti që ende nuk ka drejtësi për gjithë gjenocidin që Serbia e ka kryer mbi popullin e pafajshëm të Kosovës.

“Jemi këtu për të bërë homazhe për 98 martirët të cilët u masakruan prej forcave pushtuese të ushtrisë së policisë dhe paramilitarëve të Serbisë 23 vite më parë. Ajo që e bënë edhe më të rëndë këtë masakrën ashtu edhe shumë masakra të gjenocidit të Serbisë është fakti që plagët janë ende të hapura. Para 6 muajve ne i rivarrosëm këtu edhe të tjerë trupa të gjetur të këtyre martirëve të cilët ende po mbahen të fshehur në plotë vende brenda Serbisë. Serbia nuk i dorëzon ende qindra të tjerë të cilët janë të zhdukur me dhunë dhe i mbanë të fshehura pikërisht nëpër ato vende nëpër të cilat kanë ngritur edhe poligone ushtarake. Nuk ka kurrfarë dyshimi që përgjegjëse mbi këtë gjenocid që u bë mbi popullin e pafajshëm të Kosovës është Serbia. Por ajo që po na e bënë më të vështirë ketë dhimbje dhe këtë pikëllim është fakti që nuk ka pasur drejtësi ende për të gjithë ata 12 mijë qytetarë të Kosovës të vrarë gjatë gjenocidit të Serbisë”, tha Konjufca.

Konjufca ka thënë se nuk do të ndalen derisa Serbia të mbahet përgjegjëse për masakrat që kriminelët serbë kryen mbi popullin e Kosovës.

Ai ka nënvizuar edhe se pa gjakun e derdhur të martirëve dhe sakrificës së tyre Kosova nuk do të mund ta kishte lirinë e as shtetësinë.

“Ne nuk do të ndalemi. Do t’ia tregojmë botës dhe ta argumentojmë dhe më mirë gjenocidin që ka ndodhur derisa Serbia të mbahet përgjegjëse, e të gjenden e të dënohen të gjithë ata kriminelë të cilët janë kryes të drejtpërdrejt të masakrës së Rezallës dhe të qindra masakrave të tjera në Kosovë. lavdi martirëve të cilët e dhanë jetën për lirinë e Kosovës sepse pa gjakun e derdhur të tyre, pa sakrificën e popullit të Kosovës nuk do të kishte mund të vinte as liria të cilën e kemi sot e as shteti i Kosovës prandaj lavdia është e tyre sepse kjo sakrificë qëndron fuqishëm pikërisht në themelet e shtetit tonë të cilin ne do t’ia lëmë si trashëgimin më të rëndësishëm brezave që do të vijnë”, ka thënë Konjufca.

Në Rezallë homazhe ka bërë mëngjesin e këtij 5 prilli edhe kryeministri i Kosovës, Albin Kurti. Sot mbushen 23 vjet nga masakra në Rezallë të Skenderajt, ku nga ushtria dhe policia serbe u ekzekutuan 98 shqiptarë, banorë të Rezallës dhe fshatrave përreth, nga të cilët 44 ishin munduar t’i zhdukin.

Një pjesë e trupave u gjenden në Rudnicë të Rashkës dhe iu dorëzuan familjarëve. Më 5 prill të vitit 1999 serbët rrethuan shtëpitë e këtyre familjeve dhe pushkatuan pothuajse të gjithë burrat dhe djemtë e rinj.

Nga masakra në Rezallës vetëm tre kanë shpëtuar të gjallë. Kjo masakër konsiderohet si një ndër masakrat më të pamëshirshme gjatë luftës në Kosovë./kp/