Koncesionari gjerman i Portit të Durrësit padit Shqipërinë në Gjykatën e Arbitrazhit

Në të njëjtën ditë që Kryeministri i Shqipërisë, Edi Rama kërcënonte për mosnjohjen e vendimeve të Gjykatës së Arbitrazhit ICSID, kundër shtetit shqiptar u regjistrua një padi e re.

Më 7 prill, gjermanët e EMS Shipping & Trading ka regjistruan një çështje në Uashington, për mosmarrëveshjen sa i takon koncesionit për Portin e Durrësit.

Prej vitit 2013, kjo kompani ka fituar të drejtën e kontratës koncesionare për të operuar Terminalin Lindor në Portin e Durrësit , për ngarkimin dhe shkarkimin e anijeve. Gjermanët ankohen për projektin e ri të transformimit të portit, që do ta zhvendosë portin e mallrave në Porto Romano. Por, sipas tyre, në mungesë të portit të ri, vazhdimi i aktivitetit koncesionar të EMS nuk është i sigurt.

Kompania ka edhe rreth 25 vite të mbetura në kontratën 35-vjeçare, ndërsa fitimet e saj në vitin 2021 llogariten në rreth 1,3 milionë euro. Kjo do të thotë se kërkesa për dëmshpërblim nga ky gjyq i ri në arbitrazh mund të variojë nga disa dhjetëra deri në disa qindra milionë euro.

Përpara se t’i drejtohej tribunalit, EMS i kishte dërguar një letër ku shprehte shqetësimet e saj përfaqësuesve të qeverisë shqiptare, Kuvendit dhe përfaqësive diplomatike të Gjermanisë dhe BE në Shqipëri.

Kjo lëvizje vjen pasi Gjykata e Arbitrazhit pak ditë më parë refuzoi kërkesën e Shqipërisë për rihapjen e çështjes së fituar me herët nga biznesmeni italian Francesco Becchetti. Shqipëria duhet t’i paguajë 110 milionë euro biznesmenit italian. /Telegrafi/