Komuna e Gjilanit dhe e Gostivarit bashkë për mjedis të qëndrueshëm – nisin projektin e ri

Kryetari i Komunës së Gjilanit, Alban Hyseni, ka pritur në takim kryetarin  e Komunës së Gostivarit, Valbon Limanin nga Maqedonia e Veriut, ku është diskutuar lidhur me forcimin e bashkëpunimit ndërmjet dy komunave.

I pari i Gjilanit, tregoi se sot, Gjilani dhe Gostivari bënë një hap drejt një mjedisi më të pastër dhe zhvillimi të qëndrueshëm.

“Bashkë me kryetarin Valbon Limanin, zyrtarizuam bashkëpunimin në kuadër të programit IPA 3”, tha Hyseni.

Më tej kryetari i Gjilanit tregoi se kjo po bëhet për më shumë hapësira të gjelbra dhe ajër më të pastër., reduktim të ndotjes përmes teknologjive të reja, punëtori dhe aktivitete për ndërgjegjësimin mbi mjedisin.

“Ky është vetëm fillimi i një partneriteti të suksesshëm ndërkufitar që do të ndikojë pozitivisht në cilësinë e jetës për mijëra qytetarë! Bashkë për një të ardhme më të pastër”, tha ai.

Nga ana tjetër edhe kryetari i Komunës së Gostivarit Valbon Limani, tha se vizita në Gjilan e bëri ditën e tij më të mire, sepse pati një takim tepër efektiv me kryetarin e Komunës së Gjilanit Alban Hyseni.

“Do të bashkëpunojmë në kuadër të fondeve IPA 3 duke shtuar hapësirat e gjelbërta që tashmë janë bërë jetike për shoqërinë. Mezi pres të fillojmë dhe faleminderit për mikpritjen”, tha kryetari Limani. /Telegrafi/