Komandanti izraelit zbulon se si duhet ‘ta mposhtin me të vërtetë Hezbollahun’

Një zyrtar izraelit deklaroi se rikthimi i jetës normale civile në Izraelin verior përgjatë kufirit me Libanin është mënyra “për të mposhtur vërtetë Hezbollahun”.

“Për të mposhtur me të vërtetë Hezbollahun – sepse ushtarakisht, ne tashmë kemi fituar dhe fitorja jonë është shumë e qartë – të fitosh vërtet, të arrish fitore afatgjatë, do të thotë të kesh shumë banorë që jetojnë këtu, turizëm të gjerë, rihapni restorantet dhe kafenetë që ishin këtu, bujqësia të lulëzojë – gjithçka të lulëzojë”, tha Shefi i Forcave të Mbrojtjes izraelite (IDF) i Shtabit të Përgjithshëm, Herzi Halevi.

“Kjo është një fitore afatgjatë. Dhe shteti duhet të ndërhyjë dhe ta përforcojë fuqishëm këtë përgjegjësi”, shtoi ai.

Bëhet e ditur se një marrëveshje armëpushimi midis Izraelit dhe grupit terrorist Hezbollah në Liban të mbështetur nga Irani është mbajtur për një muaj që nga e premtja, shkruan yahoonews, përcjell Telegrafi.

Që kur marrëveshja 60-ditore hyri në fuqi më 27 nëntor, forcat izraelite kanë kryer operacione në Libanin jugor për të cilat ata thonë se synojnë të shkatërrojnë tunelet dhe qendrën komanduese të Hezbollahut.

Sipas New York Times, forcat izraelite kanë vazhduar sulmet ndërsa marrëveshja e armëpushimit është arritur, kryesisht në Libanin jugor, por tani, ditë më parë, edhe në rajonin lindor Bekaa.

Zyrtarët izraelitë thonë se Hezbollahu po përpiqet të testojë Izraelin duke kontrabanduar armë nëpër pikat kufitare libanezo-siriane.

Ndryshe, mijëra izraelitë kanë evakuuar fshatrat përgjatë kufirit me Libanin pasi Hezbollahu, në besnikëri me terroristët e Hamasit në Gaza, filloi të lëshonte raketa kundër Izraelit pas sulmeve të 7 tetorit 2023.

Forcat izraelite në përgjigje kanë goditur Libanin, duke dobësuar rëndë Hezbollahun. /Telegrafi/